सेलू : जळगाव येथे १५ ते १७ ऑगस्ट २०२५ दरम्यान जळगाव जिल्हा फ्लोअर बॉल असोसिएशनने आयोजित केलेल्या ११व्या राज्यस्तरीय फ्लोअर बॉल स्पर्धेत परभणी जिल्ह्याच्या संघाने उल्लेखनीय कामगिरी केली आहे. या संघाने १४ आणि १९ वर्षांखालील गटात एकूण ३ रौप्य पदके जिंकली, ज्यात सेलू येथील श्रीराम प्रतिष्ठान संचलित एल. के. आर. रोडगे प्रिन्स इंग्लिश स्कूलच्या ५ विद्यार्थ्यांचा मोलाचा सहभाग होता.
प्रिन्स इंग्लिश स्कूलच्या नववीतील विद्यार्थ्यांनी आपल्या उत्कृष्ट खेळाने संघाला हे यश मिळवून दिले. त्यात वैभव उत्तम शेळके, प्रवीण कैलास बंदुके, एकलनाथ नरहरी माघाडे, वैभव संजय बोडके आणि निलेश अर्जुन बोडखे यांचा समावेश होता. त्यांच्या सांघिक प्रयत्नांमुळेच परभणी संघाने ही पदके मिळवली.
या यशामागे शाळेचे क्रीडा शिक्षक कुणाल चव्हाण, सुरज शिंदे, प्रमोद देशमुख आणि कपिल ठाकूर यांचे मार्गदर्शन महत्त्वाचे ठरले. त्यांनी विद्यार्थ्यांना योग्य प्रशिक्षण देऊन स्पर्धेसाठी तयार केले.
श्रीराम प्रतिष्ठानचे संस्थापक अध्यक्ष डॉ. संजय रोडगे यांनी विद्यार्थ्यांचे अभिनंदन करताना म्हटले की, “या विद्यार्थ्यांनी आपल्या मेहनतीने आणि क्रीडा शिक्षकांच्या मार्गदर्शनाने हे यश मिळवले असून, त्यामुळे शाळेचा आणि परभणी जिल्ह्याचा गौरव वाढला आहे.”
शाळेचे मुख्याध्यापक श्री. कार्तिक रत्नाला यांनीही या कामगिरीबद्दल समाधान व्यक्त केले. ते म्हणाले, “आमच्या विद्यार्थ्यांनी रौप्य पदक मिळवून शाळेच्या क्रीडा क्षेत्रातील उत्कृष्टतेची परंपरा कायम ठेवली आहे.” या यशस्वी विद्यार्थ्यांचे श्रीराम प्रतिष्ठानचे संस्थापक अध्यक्ष डॉ. संजय रोडगे, सचिव डॉ. सविता रोडगे, प्रशासकीय अधिकारी प्रा. महादेव साबळे, मुख्याध्यापक कार्तिक रत्नाला, प्रगती क्षीरसागर आणि शाळेतील शिक्षकांनी अभिनंदन केले आहे.
