जिद्द व परिश्रमाने यश प्राप्त होते : करूणा कुलकर्णी
सेलू : कठोर परिश्रम, अभ्यासातील सातत्य, नियोजित अभ्यास आणि योग्य मार्गदर्शन असेल तर यश नक्कीच मिळते असे मत करुणा कुलकर्णी यांनी व्यक्त केले. शहरातील भारतीय शिक्षण प्रसारक संस्था अंबाजोगाई संचलित विवेकानंद प्राथमिक विद्यालयात आयोजित स्पर्धा परीक्षेत यश संपादन केलेल्या विद्यार्थ्यांच्या सत्कार समारंभात त्या बोलत होत्या.
ब्रेन डेव्हलपमेंट स्कॉलरशिप (बी.डी.एस.) व राष्ट्रीय आर्थिक दुर्बल घटक शिष्यवृत्ती (एन.एम.एम.एस.) परीक्षेत प्राविण्य मिळवलेल्या विद्यार्थ्यांचा गौरव करण्यासाठी या विशेष कार्यक्रमाचे आयोजन करण्यात आले होते. याप्रसंगी बोलताना करुणा कुलकर्णी म्हणाल्या की, विद्यार्थ्यांच्या यशात पालकांचे योगदान अत्यंत महत्त्वाचे आहे. विद्यार्थ्यांनी नियमित अभ्यास करावा आणि काही शंका असल्यास मार्गदर्शक शिक्षकांकडून त्या सोडवून घ्याव्यात. जिद्द आणि कठोर परिश्रम हेच यशाचे खरे गमक असल्याचे त्यांनी नमूद केले.
कार्यक्रमाच्या अध्यक्षस्थानी करुणा कुलकर्णी तर प्रमुख पाहुणे म्हणून उपेंद्र बेल्लुरकर उपस्थित होते. व्यासपीठावर मुख्याध्यापक नामदेव एकशिंगे, रागिणी जकाते, अनिल कौसडीकर आणि शंकर राऊत यांची प्रमुख उपस्थिती होती. यावेळी यशस्वी विद्यार्थ्यांचा त्यांच्या पालकांसमवेत पुष्प देऊन सन्मान करण्यात आला. मुख्याध्यापक नामदेव एकशिंगे यांनी विद्यार्थी दशेतच उत्तम नागरिक घडण्याचे संस्कार आत्मसात करून शाळेचा नावलौकिक वाढवावा अशी मनीषा व्यक्त केली. तसेच या परीक्षेत विद्यार्थ्यांना मोलाचे मार्गदर्शन करणाऱ्या शिक्षकांचाही मान्यवरांच्या हस्ते गौरव करण्यात आला.
कार्यक्रमाचे प्रास्ताविक नामदेव एकशिंगे यांनी केले तर सूत्रसंचालन चंदू कव्हळे यांनी केले. यशस्वी विद्यार्थ्यांच्या नावांचे वाचन चेतन नाईक यांनी केले आणि आभार स्वप्नाली देवडे यांनी मानले. कार्यक्रम यशस्वी करण्यासाठी शाळेतील सर्व शिक्षक आणि कर्मचारी यांनी विशेष परिश्रम घेतले.
