२४ व्या गळीत हंगामाचा बॉयलर अग्निप्रदीपन कार्यक्रम
पाथरी : तालुक्यातील लक्ष्मीनगर लिंबा येथील योगेश्वरी शुगर्स कारखान्याच्या २४ व्या गळीत हंगामाचा बॉयलर अग्निप्रदीपन कार्यक्रम बुधवार, २४ सप्टेंबर रोजी पार पडला. कारखान्याचे कार्यकारी संचालक ॲड. रोहित आर. देशमुख आणि त्यांच्या पत्नी सौ. उत्कर्षा रोहित देशमुख यांच्या हस्ते हा सोहळा पार पडला. यावेळी श्री यत्नेश्वर महाराज सेलुकर आणि अतुल महाराज खांडवीकर यांची प्रमुख उपस्थिती होती.याप्रसंगी एच. टी. देशमुख, एम. टी. देशमुख, जे. टी. देशमुख, संचालक राहुल आर. देशमुख, डॉ. अभिजीत आर. देशमुख, मुख्य प्रवर्तक लक्ष्मीकांतराव घोडे, सुदामराव सपाटे, गंगाधरराव गायकवाड, तुकाराम जोगदंड, बबनराव सोळंके, विनोदराव देशमुख, तसेच कारखान्याचे जनरल मॅनेजर प्रकाश चांदगुडे, डेप्युटी जनरल मॅनेजर राजकुमार तौर, डेप्युटी जनरल मॅनेजर (टेक्निकल) नवनाळे यांच्यासह अनेक मान्यवर उपस्थित होते.या हंगामात प्रतिदिन ४,५०० मेट्रिक टन उसाचे गाळप केले जाईल, अशी माहिती कार्यकारी संचालक ॲड. रोहित आर. देशमुख यांनी दिली. माजी आमदार आणि कारखान्याचे चेअरमन स्व. आर. टी. देशमुख ऊर्फ जिजा यांचे प्रतिदिन ५,००० मेट्रिक टन गाळप करण्याचे स्वप्न होते. याच दिशेने वाटचाल करत गेल्या वर्षी कारखान्याची गाळप क्षमता १,५०० मेट्रिक टनवरून २,५०० मेट्रिक टन करण्यात आली होती. तसेच यावर्षी त्यात आणखी २,००० मेट्रिक टन वाढ करण्याचे काम सहा वेगवेगळ्या कंपन्यांमार्फत सुरू असून ते अंतिम टप्प्यात आहे.या कार्यक्रमासाठी कारखान्याचे अधिकारी, कामगार, ऊस उत्पादक शेतकरी आणि ऊसतोड वाहतूकदार मोठ्या संख्येने उपस्थित होते. वैदिक मंत्रोच्चारांच्या गजरात आणि विधिवत होम-हवन झाल्यानंतर ॲड. रोहित आर. देशमुख आणि त्यांच्या पत्नी सौ. उत्कर्षा रोहित देशमुख यांच्या हस्ते बॉयलरचे अग्निप्रदीपन करण्यात आले.
