कै.ॲड.वसंतराव खारकर यांच्या स्मृतिदिनानिमित्त उपक्रम
सेलू : सेलू शहराचे ज्येष्ठ नेते, माजी नगराध्यक्ष, विधिज्ञ आणि श्री केशवराज बाबासाहेब शिक्षण संस्थेचे तत्कालीन सचिव कै. ॲड. वसंतराव खारकर यांच्या स्मृतिदिनानिमित्त ‘वसंत प्रतिष्ठान’ने एका विशेष कार्यक्रमाचे आयोजन केले आहे. या कार्यक्रमांतर्गत, ज्येष्ठ पत्रकार आणि देशभक्त पुष्पेंद्र कुलश्रेष्ठ ‘विश्वगुरू भारत’ या विषयावर व्याख्यान देणार आहेत. हे व्याख्यान शुक्रवार, ८ ऑगस्ट रोजी सायंकाळी ६ वाजता येथील साई नाट्यमंदिरात होणार आहे. वसंत प्रतिष्ठान दरवर्षी कै. वसंतराव खारकर यांच्या स्मरणार्थ अशा कार्यक्रमांचे आयोजन करत असते. व्याख्यानाला जास्तीत जास्त नागरिकांनी उपस्थित राहावे, असे आवाहन प्रतिष्ठानच्या वतीने श्री के. बा. शिक्षण संस्थेचे सचिव महेशराव खारकर आणि ॲड. उमेशराव खारकर यांनी केले आहे.
