परभणी : सेलू येथील शासकीय विश्रामगृहाच्या विस्तारीकरणासाठी सार्वजनिक बांधकाम विभागाने प्रशासकीय मान्यता दिली आहे. या कामासाठी अंदाजे ३२३ लाख रुपयांच्या खर्चाला मंजुरी मिळाली आहे. परभणी जिल्ह्याच्या पालकमंत्री तथा सार्वजनिक बांधकाम (सार्वजनिक उपक्रम) राज्यमंत्री मेघना साकोरे-बोर्डीकर यांनी यासाठी पाठपुरावा केला होता, आणि या मान्यतेबद्दल त्यांनी समाधान व्यक्त केले आहे.
सार्वजनिक बांधकाम विभागाच्या शासन निर्णय क्र.बीडीजी-२०२५/प्र.क्र. २९९/इमारती-३, दिनांक १० सप्टेंबर, २०२५ नुसार ही प्रशासकीय मान्यता देण्यात आली आहे.
नांदेड येथील सार्वजनिक बांधकाम मंडळाच्या अधीक्षक अभियंत्यांनी सेलू येथील शासकीय विश्रामगृहाच्या विस्तारीकरणासाठी कामाचे अंदाजपत्रक शासनाकडे सादर केले होते. या प्रस्तावाची तपासणी करून आणि कामांच्या किमतींमध्ये सुधारणा केल्यानंतर, प्रशासकीय मान्यता देण्यात आली.
विश्रामगृहाच्या विस्तारीकरणामध्ये तळमजला बांधकाम, विद्युतीकरण, अग्निशमन यंत्रणा, वातानुकूलन, पंप आणि जनरेटरची व्यवस्था, परिसराची प्रकाशयोजना, सीसीटीव्ही, पाणीपुरवठा, स्वच्छतागृहे, पाण्याचा मुख्य साठा, फर्निचर, अंतर्गत रस्ते, पार्किंग आणि परिसराच्या विकासाचा समावेश आहे.
