ईद-ए-मिलाद-उन-नबी निमित्त उपक्रम : दोनशे विद्यार्थ्यांचा सहभाग, सूफी एज्युकेशन ट्रस्ट आणि डॉ. झाकीर हुसेन एज्युकेशन ट्रस्टचा पुढाकार
सेलू : ईद-ए-मिलाद-उन-नबी (स.अ.व.) च्या निमित्ताने सेलू शहरात एक अनोखी इस्लामिक क्विझ स्पर्धा आयोजित करण्यात आली. सूफी एज्युकेशन ट्रस्ट आणि डॉ. झाकीर हुसेन एज्युकेशन ट्रस्टच्या सहकार्याने घिस्से खान नगरातील मदनी फंक्शन हॉलमध्ये पार पडलेल्या या स्पर्धेत स्थानिक उर्दू शाळांमधील ५ वी ते ८ वीच्या एकूण २०५ विद्यार्थ्यांनी उत्साहाने भाग घेतला.
ही स्पर्धा आधुनिक पद्धतीनुसार UPSC च्या धर्तीवर घेण्यात आली होती. यासाठी विद्यार्थ्यांना ५१२ प्रश्नांचे एक विशेष पुस्तक देण्यात आले होते. यात पैगंबर मुहम्मद (स.अ.व.) यांचे जीवन, खलिफांचे चरित्र, आणि मूलभूत धार्मिक प्रश्नांचा समावेश होता. सेलूच्या इतिहासातील ही पहिलीच स्पर्धा सूफी एज्युकेशन ट्रस्टचे सचिव आणि डॉ. झाकीर हुसेन प्राथमिक शाळेचे मुख्याध्यापक मोहम्मद अब्दुल अलीम सूफी यांच्या देखरेखीखाली आयोजित करण्यात आली. जिल्हा परिषद शाळा, शैलेजा प्राथमिक शाळा, यासेर उर्दू प्राथमिक आणि उच्च माध्यमिक शाळा, खान अब्दुल गफ्फार खान हायस्कूल आणि डॉ. झाकीर हुसेन प्राथमिक व उच्च माध्यमिक शाळेच्या विद्यार्थ्यांनी यात भाग घेतला.
मदीना मशिदीचे इमाम मौलाना शेख रईस कासमी यांच्यासह अनेक मान्यवरांनी परीक्षा केंद्राला भेट देऊन कार्यक्रमाचे कौतुक केले. या स्पर्धेतील बक्षीस वितरण सोहळा शनिवार, २७ सप्टेंबर रोजी सकाळी १० वाजता मदनी फंक्शन हॉलमध्ये होणार आहे. यात प्रथम, द्वितीय आणि तृतीय क्रमांक मिळवणाऱ्या विद्यार्थ्यांना अनुक्रमे ३,०००, २,००० आणि १,००० रुपयांची बक्षिसे दिली जातील, तसेच सर्व सहभागी विद्यार्थ्यांना प्रोत्साहनपर बक्षिसे दिली जाणार आहेत. मोहम्मद अब्दुल अलीम सूफी यांनी या यशस्वी आयोजनासाठी सर्व सहभागी शाळा आणि शिक्षकांचे आभार मानले. अशा कार्यक्रमांमुळे मुलांमध्ये धार्मिक ज्ञानाची आवड निर्माण होते, असे त्यांनी सांगितले.
