महापुरामुळे दहन कार्यक्रम रद्द; आ. गुट्टे यांच्या हस्ते विसर्जन
गंगाखेड : सर्वत्र झालेली अतिवृष्टी आणि गोदावरी नदीला आलेला महापूर या संकटामुळे गंगाखेड येथे अपप्रवृत्तीच्या पुतळ्याचे दहन करण्याऐवजी चक्क गोदावरीच्या पात्रात विसर्जन करण्यात आले. साई सेवा प्रतिष्ठानने या आगळ्यावेगळ्या कार्यक्रमाचे आयोजन केले होते. “जास्त पावसामुळे यावेळी रावणाला जाळण्याऐवजी बुडवावा लागेल” अशा आशयाचे समाजमाध्यमांवर गाजत असलेले विडंबन गंगाखेडमध्ये प्रत्यक्षात उतरल्याचे बघायला मिळाले.
कार्यक्रमाचे रौप्यमहोत्सवी वर्ष
गंगाखेडच्या दसरा महोत्सवाच्या पार्श्वभूमीवर साई सेवा प्रतिष्ठानतर्फे दरवर्षी अपप्रवृत्ती पुतळा दहन, आतषबाजी, गुणवंत गौरव आणि सांस्कृतिक कार्यक्रमांचे आयोजन केले जाते. या उपक्रमाचे हे २५ वे वर्ष होते. गोदावरीला आलेल्या महापूरामुळे सुरुवातीला कार्यक्रमाचे ठिकाण बदलण्यात आले. परंतु, दुसऱ्या ठिकाणीही पुराचे पाणी शिरले आणि शहराची परिस्थितीही गंभीर बनत चालली होती. या सर्व बाबी लक्षात घेऊन, आयोजकांनी सर्व उत्सवी कार्यक्रमांना फाटा देत, पूरग्रस्तांना जीवनावश्यक वस्तूंचे वाटप करण्याचा कार्यक्रम घेतला.
मान्यवरांच्या उपस्थितीत विसर्जन
उत्सवी कार्यक्रम रद्द करून केवळ अपप्रवृत्तीच्या पुतळ्याचे दहन करण्याऐवजी गोदावरीत विसर्जन करण्यात आले. गंगाखेडचे आमदार डॉ. रत्नाकर गुट्टे, बाजार समितीचे सभापती साहेबराव भोसले, उपविभागीय अधिकारी जिवराज डापकर, पोलीस निरीक्षक श्रीकांत डोंगरे यांच्या हस्ते पुतळा विसर्जित करण्यात आला. यावेळी ज्येष्ठ नेते गोपालदास तापडिया, माजी जि. प. सदस्य किशनराव भोसले, तालुका संघाचे मुख्य प्रशासक गंगाधर पवार, संचालक प्रमोद साळवे, कॉंग्रेसचे जिल्हा उपाध्यक्ष ॲड. संतोष मुंडे, बाजार समितीचे उपसभापती संभाजीराव पोले, संचालक आळसे मामा, बालाजी मुंडे, माजी नगरसेवक सत्यपाल साळवे, तुकाराम तांदळे, राजू दामा, दिपक तापडिया, राजू पटेल, व्यापारी महासंघाचे अध्यक्ष दगडू सोमाणी, अनिलसेठ यानपल्लेवार आदींची उपस्थिती होती.
…यांनी घेतला पुढाकार
साई सेवा प्रतिष्ठानचे अध्यक्ष तथा संयोजक गोविंद यादव, नागेश पैठणकर, मनोज नाव्हेकर, रमेश औसेकर, गुंडेराव देशपांडे, नंदकुमार भरड, गजानन महाजन, अंबादास राठोड, जुगल तोतला, अनंत मुंडे, राजू जवादे, विष्णू अनावडे, नारायण घनवटे, माधवराव चव्हाण आदींनी उपस्थितांचे स्वागत केले. कार्यक्रमाच्या यशस्वीतेसाठी सुहास देशमाने, व्यंकटेश यादव, संजय सोनटक्के, किरण यादव, परसराम गिराम, प्रथम यादव, अक्षय मेहत्रे, अथर्व महाजन आदींसह प्रतिष्ठानच्या पदाधिकाऱ्यांनी परिश्रम घेतले.
