२८ वर्षांच्या प्रदीर्घ सेवेचा जिल्हाधिकारी आणि मान्यवरांच्या उपस्थित गौरव
परभणी : जिल्हाधिकारी कार्यालयातील लेखाधिकारी वैजनाथ पंडितराव जाधव हे ३० सप्टेंबर २०२५ रोजी नियतवयोमानानुसार सेवानिवृत्त झाले. त्यांच्या सेवापूर्तीनिमित्त जिल्हाधिकारी संजयसिंह चव्हाण यांच्या अध्यक्षतेखाली सेवागौरव सोहळा आयोजित करण्यात आला होता. याप्रसंगी व्यासपीठावर अपर जिल्हाधिकारी डॉ. प्रताप काळे, निवासी उपजिल्हाधिकारी अनुराधा ढालकरी, उपजिल्हाधिकारी अरूणा संगेवार, अनिता भालेराव, संगिता चव्हाण आदींसह तहसीलदार, नायब तहसीलदार तसेच जिल्हाधिकारी कार्यालयातील सर्व अधिकारी व कर्मचारी उपस्थित होते. याप्रसंगी जिल्हाधिकारी चव्हाण आणि मान्यवरांच्या हस्ते लेखाधिकारी वैजनाथ जाधव, त्यांच्या पत्नी मीना जाधव यांचा यथोचित सन्मान करण्यात आला. या वेळी डॉ.श्रीनाथ जाधव, शीतल शिंदे, शिवानी जाधव आणि कुटुंबिय उपस्थित होते. उपस्थित मान्यवरांनी श्री. जाधव यांच्या प्रदीर्घ व निष्ठावान सेवेबद्दल त्यांचे अभिनंदन केले आणि उत्तम आरोग्य आणि पुढील आयुष्यासाठी त्यांना शुभेच्छा दिल्या.
श्री. जाधव यांनी प्रशासनात २८ वर्षांची प्रदीर्घ आणि उल्लेखनीय सेवा केलेली आहे. त्यांची नेमणूक सुरुवातीला कनिष्ठ लेखाधिकारी म्हणून पंचायत समिती पाथरी येथे झाली. त्यानंतर पंचायत समिती सेलू येथे त्यांची सहाय्यक लेखाधिकारी या पदावर पदोन्नती झाली. जि. प. परभणी येथील ग्रामीण पाणीपुरवठा विभागातही ते कार्यरत होते. सन २०१६ मध्ये त्यांची लेखाधिकारी या पदावर पदोन्नती होऊन जिल्हा अधीक्षक कृषी अधिकारी, जालना येथे पदस्थापना झाली. त्याठिकाणी त्यांनी ३ वर्षे ६ महिने काम केले. त्यानंतर उपविभागीय कृषी अधिकारी परभणी येथे पोकरा (POCRA) प्रकल्पात त्यांनी २ वर्षे सेवा दिली. ३० जून २०२४ रोजी पोकरा प्रकल्पाचा पहिला टप्पा बंद झाल्यानंतर शासनाने त्यांची बदली जिल्हाधिकारी कार्यालय परभणी येथे लेखाधिकारी या पदावर केली आणि येथूनच ते सेवानिवृत्त झाले.
