तीन दिवसीय महोत्सवात विविध धार्मिक कार्यक्रमांचे आयोजन
सेलू : येथील पांडे गल्लीतील अत्यंत पुरातन आणि भाविकांचे श्रद्धास्थान असलेल्या तसेच संकटात सापडलेल्या भक्तांच्या हाकेला धावून येणाऱ्या विष्णूचा चौथा अवतार असलेल्या नृसिंह मंदिरात दरवर्षीप्रमाणे यंदाही कार्तिकी पौर्णिमा उत्सवाला आज बुधवारी, ५ नोव्हेंबर २०२५ रोजी उत्साहात प्रारंभ झाला आहे.
तीन दिवसीय या महोत्सवाच्या पहिल्या दिवशी आज सकाळी श्रींच्या मूर्तीस सतीशराव दिग्रसकर यांच्या वतीने कौस्तुभ दिग्रसकर यांच्या हस्ते लघुरुद्र अभिषेक करण्यात आला. या कार्यक्रमात दररोज रात्री आठ ते नऊ या वेळेत येथील गुरुवार पाठ मंडळाच्या वतीने गणपती अथर्वशीर्ष, गीतेचे अध्याय, रामरक्षा तसेच विष्णुसहस्रनाम पठन करण्यात येत आहे. तसेच आज, ५ नोव्हेंबर रोजी रात्री नऊ वाजता मंदिर मध्ये पादुका प्रदक्षिणा व भजन होणार आहे. उद्या, ६ नोव्हेंबर रोजी सायंकाळी सहा ते आठ या वेळेत “पिठलं भाकर व कण्या” या पारंपरिक महाप्रसादाचे आयोजन करण्यात आले आहे. त्यानंतर ७ नोव्हेंबर रोजी प्रक्षाळ पूजेने उत्सवाची सांगता होणार असून रात्री नऊ वाजता गुरुवार पाठ मंडळ यांचे विडा भजन होणार आहे. भाविक भक्तांनी या कार्यक्रमास उपस्थित राहून श्री नृसिंह दर्शनाचा व प्रसादाचा लाभ घ्यावा, असे आवाहन पुजारी अनंतराव पाटील, देविदास पाटील, केशव पाटील आणि नारायण पाटील यांनी केले आहे.
