परभणी जिल्हा परिषद व पंचायत समिती निवडणूक मतदान प्रक्रियेसाठी प्रशासन सज्ज, निर्भयपणे मतदानाचे जिल्हाधिकारी संजयसिंह चव्हाण आवाहन
परभणी : परभणी जिल्ह्यातील जिल्हा परिषद व पंचायत समितीच्या सार्वत्रिक निवडणुकीसाठी शनिवार ७ फेब्रुवारी २०२६ रोजी मतदान प्रक्रिया पार पडणार आहे. मतदानाची वेळ सकाळी ७.३० ते सायंकाळी ५.३० अशी असून, लोकशाहीच्या बळकटीकरणासाठी मतदारांनी कोणत्याही प्रलोभनाला बळी न पडता निर्भयपणे आपला अमूल्य हक्क बजावावा, असे आवाहन जिल्हाधिकारी तथा जिल्हा निवडणूक अधिकारी संजयसिंह चव्हाण यांनी केले आहे.
जिल्ह्यात एकूण ७०५ ग्रामपंचायती असून जिल्हा परिषदेच्या ५४ गट तर पंचायत समितीच्या १०८ गणांसाठी ही निवडणूक होत आहे. सेलू तालुक्यात जिल्हा परिषदेचे ५ गट तर पंचायत समितीचे १० गण आहेत. याशिवाय जिंतूर १० गट, २० गण; मानवत ४ गट, ८ गण; पाथरी ५ गट, १० गण; सोनपेठ ३ गट, ६ गण; परभणी १० गट, २० गण; गंगाखेड ७ गट, १४ गण; पालम ४ गट, ८ गण तर पूर्णा तालुक्यात ६ गट व १२ गणांसाठी मतदान होणार आहे.
१० लाख ४५ हजार मतदारांसाठी १,२७८ केंद्रे
जिल्ह्यात एकूण १,२७८ मतदान केंद्रे असून १० लाख ४५ हजार ८५५ मतदार आपला हक्क बजावतील. यामध्ये ५ लाख ४२ हजार ९३७ पुरुष मतदार, ५ लाख २ हजार ९१३ स्त्री मतदार तर ५ तृतीयपंथीय मतदारांचा समावेश आहे. मतदान प्रक्रियेसाठी प्रशासन सज्ज झाले असून केंद्रांवर मतदारांसाठी आवश्यक त्या सुविधा उपलब्ध करून देण्यात आल्या आहेत. मतदानाच्या पार्श्वभूमीवर कडक सुरक्षा बंदोबस्त तैनात करण्यात आला आहे.
परभणी जिल्ह्यातील सर्व नऊ तालुक्यांमधील मतदान क्षेत्रातील मतदार असलेले कामगार, अधिकारी व कर्मचारी यांना मतदानासाठी भरपगारी सुट्टी देण्याचे निर्देश देण्यात आले आहेत. हे आदेश सर्व आस्थापना, कारखाने आणि दुकानांना लागू राहतील. अपवादात्मक परिस्थितीत सुट्टी देणे शक्य नसल्यास मतदानासाठी किमान दोन ते तीन तासांची सवलत देणे बंधनकारक राहील. तसेच मतदान केंद्रावर मोबाईल फोन वापरण्यास सक्त मनाई करण्यात आली आहे.मतदान प्रक्रिया शांततेत पार पाडण्यासाठी वडगाव सुक्रे, टाकळी बोबडे, ढेगळे पिंपळगाव, पाथरगव्हाण बु, वाघाळा, गंगाखेड शहर, केकरजवळा, गोगलगाव, पालम शहर, शेळगाव म., शिर्शि बु., कावी, आडगाव आणि कात्नेश्वर येथील आठवडी बाजार ७ फेब्रुवारी २०२६ रोजी बंद राहतील.
९ फेब्रुवारीला मतमोजणी
या निवडणुकीची मतमोजणी सोमवार ९ फेब्रुवारी रोजी सकाळी पार पडणार आहे. त्यासाठी सेलू, मानवत, सोनपेठ, पालम व पूर्णा येथे तहसील कार्यालयात, जिंतूर व पाथरी येथे आयटीआयमध्ये, परभणी येथे कृषी अभियांत्रिकी महाविद्यालय आणि गंगाखेड येथे नवीन उपविभागीय अधिकारी कार्यालय या ठिकाणी मतमोजणीची केंद्रे निश्चित करण्यात आली आहेत.
