एक एकर जागेची आवश्यकता, शासकीय बाजारभाव (रेडी रेकनर) दराने खरेदी होणार
परभणी : लोकनेते गोपीनाथ मुंडे ऊसतोड कामगार कल्याण महामंडळामार्फत जिल्ह्यातील गंगाखेड, पालम व सोनपेठ येथे मुलांचे व मुलींचे प्रत्येकी एक अशा एकूण सहा संत भगवान बाबा शासकीय वसतिगृहांची स्थापना सन २०२४-२५ या शैक्षणिक वर्षापासून करण्यात आली आहे. सदर वसतिगृहे सध्या खाजगी अथवा भाडेतत्त्वावरील इमारतींमध्ये सुरू असून गंगाखेड, पालम व सोनपेठ या तालुक्यांच्या शहरात अथवा शहरापासून तीन किलोमीटरच्या आतील परिसरात प्रत्येक वसतिगृहासाठी एक एकर जागेची आवश्यकता आहे. सदर खाजगी जमीन शासकीय बाजारभाव (रेडी रेकनर) दराने खरेदी करण्यात येणार आहे.
संत भगवान बाबा शासकीय वसतिगृहाकरिता जमीन विक्री करण्याची इच्छा असलेल्या इच्छुक व पात्र व्यक्तींनी आवश्यक कागदपत्रांसह जमीन विक्रीचा प्रस्ताव सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्याय भवन, जायकवाडी वसाहत, परभणी येथे सादर करावा, असे आवाहन सहाय्यक आयुक्त समाज कल्याण, आर. एच. एडके यांनी केले आहे. प्रस्तावासोबत जमिनीचा अद्ययावत ७/१२ उतारा व फेरफार नोंद, जमिनीच्या मालकी हक्काचा ३० वर्षांचा सर्च रिपोर्ट, गाव नकाशा व गुगल मॅप लोकेशन, जागेवर कोणत्याही प्रकारचा कायदेशीर वाद अथवा बोजा नसल्याचे प्रमाणपत्र तसेच जागेवर पाणी, वीज व पोहोच रस्ता उपलब्ध असणे बंधकारक आहे. जागेचे छायाचित्रे सादर करणे आवश्यक आहे.
