सिमेंट रस्ता कामाचे थाटात भूमिपूजन; दर्जेदार व वेळेत काम पूर्ण करण्याचे माजी नगराध्यक्ष पवन आडळकर यांचे आश्वासन
सेलू : येथील आदर्श नगरमध्ये सिमेंट रस्ता कामाचे भूमिपूजन रविवारी, १२ जुलै रोजी नगराध्यक्ष मिलिंद सावंत, काँग्रेसचे गटनेते तथा माजी नगराध्यक्ष पवन आडळकर, नगरसेवक मिलिंद पवार, शिवसेना गटनेते संदीप लहाने यांच्या प्रमुख उपस्थितीत करण्यात आले. या विकास कामामुळे आदर्शनगरकडे जाणारी वाट खड्डेमुक्त आणि चिखलमुक्त होणार आहे
भूमिपूजन प्रसंगी बोलताना माजी नगराध्यक्ष पवन आडळकर यांनी सांगितले की, नागरिकांची मागणी लक्षात घेऊन आदर्श नगरकडे जाणार्या या सिमेंट रस्त्यासाठी निधी मंजूर करण्यात आला आहे. हे काम अत्यंत दर्जेदार आणि वेळेत पूर्ण केले जाईल, जेणेकरून पुढील अनेक वर्षे नागरिकांना कोणताही त्रास होणार नाही असे सांगितले. यावेळी कामाची सुरुवात सुधाकर पवार, दिलीप सांगतानी, ॲड. उमेश खारकर, बाबा काटकर, अविनाश शेरे, हनुमान गात, मदन पवार, कल्याण पवार यांच्या हस्ते नारळ वाढवून आणि पायाभरणी करून करण्यात आले.
यावेळी परिसरातील नागरिक आणि पदाधिकारी मोठ्या संख्येने उपस्थित होते.गेल्या अनेक दिवसांपासून या कॉलनीतील अंतर्गत रस्त्यांची दुरवस्था झाली होती. पावसाळ्यात येथे चिखलाचे साम्राज्य निर्माण होत असल्याने ज्येष्ठ नागरिक आणि लहान मुलांना चालणे कठीण झाले होते. स्थानिक रहिवाशांनी या संदर्भात लोकप्रतिनिधी, नगरसेवकांकडे सातत्याने पाठपुरावा केला होता. या कामाची सुरुवात झाल्यामुळे कॉलनीतील महिला व नागरिकांनी लोकप्रतिनिधींचे आभार मानले असून पेढे वाटून आनंद साजरा केला.
