नूतन शिक्षण संस्थेच्या वर्धापनदिनानिमित्त आज कार्यक्रम

सेलू : येथील नूतन विद्यालय शिक्षण संस्थेचा वर्धापनदिन आणि श्रीरामजी भांगडिया स्मृतिदिन तसेच श्रीरामजी भांगडिया शतकोत्तर रजत जयंती वर्षाचे औचित्य साधून शुक्रवारी, ३ जुलै २०२६ रोजी दुपारी ३:३० वाजता विशेष कार्यक्रमाचे आयोजन करण्यात आले आहे. अध्यक्षस्थानी संस्थेचे अध्यक्ष डॉ. एस.एम.लोया हे असणार आहेत. प्रमुख पाहुणे म्हणून परभणी येथील प्रसिद्ध बालरोग तज्ज्ञ डॉ. सत्यनारायणजी सोमाणी लाभणार असून, डॉ.मनीषा घांडगे-डोंबे यांची विशेष उपस्थिती राहणार आहे. नूतन कन्या प्रशालेतील कै.सौ.कमलाबाई आसारामजी बाहेती सभागृहात आयोजित कार्यक्रमास शिक्षणप्रेमींनी आवर्जून उपस्थित राहावे, असे आवाहन संस्थेचे उपाध्यक्ष डी.के.देशपांडे, चिटणीस प्राचार्य डॉ.व्ही.के. कोठेकर, सहचिटणीस जयप्रकाश बिहाणी, प्रशासकीय अधिकारी डॉ. शरद कुलकर्णी आणि कार्यकारी मंडळाने केले आहे.