आषाढी एकादशीनिमित्त विविध सांस्कृतिक कार्यक्रम
सेलू : देवशयनी आषाढी एकादशीचे औचित्य साधून येथील एल. के. आर. रोडगे प्रिन्स इंग्लिश स्कूल व ज्युनिअर कॉलेजमध्ये शुक्रवारी, २४ जुलै २०२६ रोजी शालेय परिपाठात पालखी सोहळ्याचा सांस्कृतिक कार्यक्रम भक्तिमय वातावरणात उत्साहात पार पडला.
श्रीराम प्रतिष्ठानचे संस्थापक अध्यक्ष डॉ. संजय रोडगे, मुख्याध्यापिका मीरा मिरांडा, अनिल सर आणि अब्दुल सर यांच्या प्रमुख उपस्थितीत हा कार्यक्रम झाला. कार्यक्रमाची सुरुवात विठ्ठल नामाच्या गजरात दिंडी व पालखी सोहळ्याने झाली. त्यानंतर डॉ. संजय रोडगे यांच्या हस्ते श्री विठ्ठल-रुक्मिणी प्रतिमेचे पूजन करण्यात आले. विद्यार्थ्यांनी अभंग, भक्तिगीते, गवळणी, समूहगायन व पारंपरिक वेशभूषेतील समूह नृत्य सादर केले. या कार्यक्रमाचे दिग्दर्शन मिलिंद खंदारे यांनी केले.या वेळी डॉ. संजय रोडगे यांनी विद्यार्थ्यांना मार्गदर्शनात संतपरंपरा, वारकरी संप्रदाय आणि भारतीय संस्कृतीतील आषाढी एकादशीचे महत्त्व विशद केले. तसेच मराठी विषयाचे शिक्षक अयोध्या चौरे, माने सर व घुगे सर यांनी वारकरी संप्रदायाची परंपरा व पंढरपूर यात्रेची माहिती दिली. कार्यक्रमाचे सूत्रसंचालन रीना ठाकूर यांनी केले. कार्यक्रम यशस्वी करण्यासाठी शिक्षक, शिक्षकेतर कर्मचारी व विद्यार्थ्यांनी परिश्रम घेतले.
