आपुलकी व आस्था संस्थेच्या वतीने गौरव, श्रीराम प्रतिष्ठानतर्फे सत्कार
सेलू : ग्रामीण भागातील प्रतिकूल परिस्थितीवर मात करत, जिद्दीच्या बळावर शिक्षण क्षेत्रात वेगळी ओळख निर्माण करणारे ‘श्रीराम प्रतिष्ठान’चे विज्ञान शिक्षक नारायण बाबुराव चौरे यांना सेलू येथे आपुलकी व आस्था संस्थेच्या वतीने २६ जुलै २०२६ रोजी “मराठवाडा आदर्श शिक्षक पुरस्कार २०२६” देऊन गौरविण्यात आले.
वांजोळा (जि. जालना) येथील रहिवासी असलेल्या चौरे यांचे वडील बाबुराव चौरे परिसरात ‘रामायण वाचक’ म्हणून प्रसिद्ध असून आई मंगल चौरे शेतात कष्ट करतात. तर पत्नी अयोध्या चौरे नोकरी करत कौटुंबिक जबाबदारी सांभाळतात. श्री.चौरे यांनी प्राथमिक शिक्षण जवाहर नवोदय विद्यालय आंबा येथून पूर्ण केल्यानंतर नूतन महाविद्यालयातून बी.एस्सी. केले. घरच्या हलाखीच्या परिस्थितीमुळे छत्रपती संभाजीनगर येथे नोकरी करत त्यांनी एम.सी.एम. पदवी पूर्ण केली.
२०११ पासून ते ‘श्रीराम प्रतिष्ठान’ सेलू येथे विज्ञान शिक्षक म्हणून कार्यरत आहेत. त्यांना राजेश काळे यांची मोलाची साथ लाभली.त्यांनी स्वतः तयार केलेल्या विज्ञान शैक्षणिक साहित्यामुळे परभणी जिल्ह्याला सलग तीन वर्षे (२०२३ ते २०२५) राज्य स्तरावर नेतृत्व करण्याची संधी मिळाली. विज्ञान प्रदर्शनात त्यांनी दोन वेळा राष्ट्रीय व चार वेळा राज्य स्तरावर यश मिळवले आहे. विद्यार्थ्यांसाठी त्यांनी ‘सायन्स चॅलेंज’, ‘माय सायन्स लॅब ॲट होम’, ‘वर्गातील विज्ञान कोपरा’ व ‘परिपाठातील प्रयोग’ यांसारखे नाविन्यपूर्ण उपक्रम राबवले.या यशाबद्दल श्रीराम प्रतिष्ठानचे प्रशासकीय अधिकारी प्रा. महादेव साबळे आणि वांजोळा येथील विठ्ठल सरकटे व गावकऱ्यांनी त्यांचा विशेष सत्कार केला.
“नारायण चौरे यांच्यासारखे प्रयोगशील आणि ध्येयवादी शिक्षक लाभणे हे श्रीराम प्रतिष्ठानचे मोठे भाग्य आहे. त्यांनी विज्ञानाला ग्रामीण भागातील विद्यार्थ्यांच्या घराघरांपर्यंत पोहोचवले आहे. या बहुमानामुळे संस्थेच्या शिरपेचात मानाचा तुरा रोवला गेला आहे.”- डॉ. संजय रोडगे (संस्थापक अध्यक्ष, श्रीराम प्रतिष्ठान सेलू)
“माझ्या वडिलांचे धार्मिक संस्कार, आईचे कष्ट आणि पत्नीची साथ यामुळेच मी इथपर्यंत पोहोचू शकलो. तसेच संकटाच्या काळात राजेश काळे यांची मिळालेली सोबत आणि श्रीराम प्रतिष्ठानने दिलेला विश्वास यामुळे हे कार्य करू शकलो. हा पुरस्कार माझ्या कुटुंबाला, गावकऱ्यांना आणि संस्थेला समर्पित आहे.” – नारायण चौरे (पुरस्कारप्राप्त शिक्षक)
