दलित आघाडीचे अमित भालेराव यांचा कार्यकर्त्यांसह ठाकरे गटात प्रवेश
परभणी, दि.२८ : शिवसेना उद्धव बाळासाहेब ठाकरे गटाचे आमदार डॉ. राहुल पाटील यांनी परभणीत शिवसेना शिंदे गटाला मोठा धक्का दिला आहे. शिंदे गटाचे दलित आघाडी जिल्हाप्रमुख अमित भालेराव यांनी २७ जुलै रोजी अनेक कार्यकर्त्यांसह ठाकरे गटात जाहीर प्रवेश केला.
आमदार पाटील यांच्या या राजकीय चालीमुळे परभणीत शिंदे गटाला मोठे खिंडार पडल्याची चर्चा आहे.मागील काही दिवसांपासून ठाकरे गटात प्रवेश करणाऱ्यांची संख्या सातत्याने वाढत आहे. आमदार डॉ. राहुल पाटील यांच्या खंबीर नेतृत्वावर आणि पक्षप्रमुख उद्धव ठाकरे यांच्या विचारांवर विश्वास ठेवून विविध पक्षांतील पदाधिकारी व कार्यकर्ते पक्षात प्रवेश करत आहेत. आमदार पाटील यांनी पक्षसंघटन मजबूत करण्यावर विशेष भर दिला असून, त्यामुळे संपूर्ण जिल्ह्यात ठाकरे गटाला नवचैतन्य मिळाले आहे. आता त्यांनी थेट शिंदे गटातील पदाधिकाऱ्याला गळाला लावत मोठा राजकीय धक्का दिला आहे.या प्रवेश सोहळ्याच्या वेळी महानगरप्रमुख डॉ. विवेक नावंदर, जिल्हाप्रमुख विष्णू मुरकुटे, रविंद्र धर्मे, विधानसभा प्रमुख कल्याणराव रेंगे, उपजिल्हाप्रमुख मुंजा कोल्हे, दिनेश बोबडे, सुभाष जोंधळे, बाळासाहेब राखे, रामराव डोंगरे, संदिप झाडे, सुनील पंढरकर, धम्मा साळवे, शैलेश भाग्यवंत, रामराज कनकुटे आणि विष्णू आवचार यांच्यासह शिवसेना व युवासेनेचे पदाधिकारी व कार्यकर्ते मोठ्या संख्येने उपस्थित होते.
