परभणीच्या एचएआरसी संस्थेचा उपक्रम : रक्षाबंधनानिमित्त डाळ-पिठाची गिरणी; चार मुलींचे शैक्षणिक पालकत्व
सेलू, दि. २३ ऑगस्ट : श्रावण मास व रक्षाबंधनानिमित्त मोरेगाव, ता. सेलू येथील विधवा सुवर्णा शंकर माने यांना उदरनिर्वाहासाठी १.५ अश्वशक्तीची डाळ-पिठाची गिरणी भेट देण्यात आली. तसेच त्यांच्या पाच मुलींपैकी चार मुलींचे शैक्षणिक पालकत्व स्वीकारून शैक्षणिक साहित्याचे वाटप करण्यात आले.
हा उपक्रम होमिओपॅथिक अकॅडमी ऑफ रिसर्च अँड चॅरिटिज (एचएआरसी), परभणी यांच्या वतीने राबविण्यात आला.पतीच्या निधनानंतर सुवर्णा माने यांच्यावर पाच मुलींच्या संगोपनाची व शिक्षणाची जबाबदारी आली आहे. पूजा दहावी, भक्ती आठवी, भावना तिसरी आणि श्रावणी पहिलीमध्ये शिक्षण घेत असून, स्वरा अंगणवाडीत आहे. पती मजूर असल्याने पेन्शनचा आधार नाही. शासकीय लाभ किंवा घरकुलही मिळालेले नसून, माहेर व सासरकडून मदत नसल्याने त्या शेतमजुरी करून कुटुंबाचा उदरनिर्वाह करतात.मोरेगाव जिल्हा परिषद शाळेचे शिक्षक किशन कटारे यांनी या कुटुंबाची परिस्थिती एचएआरसीपर्यंत पोहोचवली. त्यानंतर संस्थेने गिरणी देऊन सुवर्णा माने यांना स्वयंरोजगाराचा मार्ग उपलब्ध करून दिला. आर्थिक परिस्थितीमुळे मुलींचे शिक्षण खंडित होऊ नये, यासाठी चार मुलींचे शैक्षणिक पालकत्व स्वीकारण्यात आले.या उपक्रमासाठी जुगल राठी, राजकुमार भगत, अंबरेश्वर राठी, सचिन सरकले, डॉ. श्रीनिवास केशट्टी, डॉ. दिनेश भुतडा, विष्णू मोरे, पुरुषोत्तम काळदाते, वैभव गाडगे व गणेश काळदाते यांनी आर्थिक सहकार्य केले.यावेळी एचएआरसीचे अध्यक्ष डॉ. पवन सत्यनारायण चांडक, डॉ. श्रीनिवास केशट्टी, डॉ. दिनेश भुतडा, प्रकाश डुबे, किशन कटारे, अरुण वैद्य, माधव गव्हाणे, राम गायकवाड, शरद ठाकर, दिलीपराव (नाना) मगर, तुळशीदास मगर, प्रकाशराव नाटकर व योगेश काकडे उपस्थित होते.*महिला सक्षमीकरणांतर्गत* एचएआरसीने आतापर्यंत ९९ निराधार, एकल व विधवा महिलांना शिलाई मशीन, डाळ मिल, पिठाची गिरणी, शेळी-करडू आदी स्वयंरोजगाराची साधने उपलब्ध करून दिली आहेत.
