आरोग्य विभागातर्फे नागरिकांना आवाहन
परभणी : इबोला अत्यंत गंभीर आणि जीवघेणा विषाणूजन्य आजार आहे. इबोला विषाणूचा प्रसार रोखण्यासाठी जिल्हा परिषदेच्या आरोग्य विभागातर्फे नागरिकांना महत्त्वाची खबरदारी घेण्याचे आवाहन करण्यात आले आहे.
इबोलाची लक्षणे- अचानक ताप येणे. अशक्तपणा आणि स्नायूंमध्ये तीव्र वेदना. डोकेदुखी आणि घशात खवखव. उलटी, जुलाब आणि तीव्र पोटदुखी. काही गंभीर रूग्णांना अंतर्गत किंवा बाह्य रक्तस्त्राव होणे; अशी आहेत. हा आजार श्वसनावाटे पसरत नाही; तो केवळ मानवाकडून मानवाकडे पसरतो. इबोला हा संसर्गित व्यक्तीच्या रक्त, लाळ, घाम, उलट्या, मलमूत्र किंवा इतर शारीरिक द्रवांच्या थेट संपर्कातून पसरतो. संसर्गित व्यक्तीच्या वस्तूंनास्पर्श केल्यानेही बाधा होऊ शकते.
प्रतिबंधात्मक उपाय- साबणाने वारंवार हात धुवावेत वैयक्तिक स्वच्छतेची काळजी घ्यावी. संशयित रुग्णांच्या थेट संपर्कात येणे टाळावे. आरोग्य विभागाने दिलेल्या सर्व सूचनांचे काटेकोर पालन करावे. ताप, उलटी किंवा रक्तस्त्राव अशी लक्षणे दिसल्यास शासकीय रुग्णालयात जाऊन वैद्यकीय सल्ला घ्यावा.
सध्या काही आफ्रिकी देशांमध्ये इबोलाचा प्रादुर्भाव आढळून आला आहे. नागरिकांनी अफवांवर विश्वास ठेवू नये केवळ अधिकृत आरोग्य विभागाकडून मिळणाऱ्या माहितीवरच विश्वास ठेवावा, असे आवाहन जिल्हा आरोग्य अधिकारी डॉ संजयकुमार पांचाळ यांनी केले आहे.
