काँग्रेस प्रदेशाध्यक्ष हर्षवर्धन सपकाळ यांचे सेलूतील सभेत आवाहन, भाजपच्या धोरणांवर जोरदार टीका, काँग्रेस आघाडीला विजयी करण्याची साद
परभणी : नगरपालिका निवडणूक ही संस्कृती विरुद्ध भाजपाच्या भ्रष्टाचारी विकृतीची लढाई आहे. नगरपालिका निवडणुकीत भाजपने सत्तेच्या दलालांना उमेदवारी दिली असून अशा प्रवृत्तीला मतदारांनी योग्य जागा दाखवावी, आणि सेलू नगरपालिका निवडणुकीत कॉंग्रेस आणि आघाडीच्या उमेदवारांना विजयी करावे, असे आवाहन काँग्रेसचे प्रदेशाध्यक्ष हर्षवर्धन सपकाळ यांनी सेलूत झालेल्या सभेत केले.
काँग्रेस, शिवसेना (उबाठा), राष्ट्रवादी काँग्रेस (अजित पवार गट) व मित्रपक्षांच्या प्रचारार्थ शनिवारी दुपारी चार वाजता लोकशाहीर अण्णाभाऊ साठे पुतळ्यासमोर झालेल्या सभेत सपकाळ बोलत होते. या वेळी माजी खासदार तुकाराम रेंगे, माजी आमदार सुरेशराव देशमुख, तालुकाध्यक्ष हेमंतराव आडळकर, नगराध्यक्षपदाचे उमेदवार आत्माराम साळवे, सिद्धार्थ हत्तीअंबरे, डॉ.सरताज, नदीम इमानदार, पवन आडळकर, नागसेन भेरजे, सुधाकर रोकडे, रणजित गजमल, आप्पा डख, तसेच पदाधिकारी आणि आघाडीतील नगरसेवक उमेदवार उपस्थित होते.
सपकाळ म्हणाले की, राहुल गांधी यांच्या नेतृत्वाखाली नवा भारत घडवण्याचा काँग्रेसचा संकल्प आहे. त्यामुळे स्वातंत्र्याच्या दुसऱ्या लढाईसाठी सर्वांनी तयार राहावे. भाजपचे ‘पैसा फेक तमाशा देख’ धोरण देशाला खाईकडे नेत असून जातीय आणि सामाजिक फूट पाडण्याचा खेळ सुरू आहे. महाराष्ट्राचे नुकसान करणाऱ्या या राजकारणाचा धिक्कार केला पाहिजे, असे ते म्हणाले.
सेलू नगरपालिका निवडणुकीत काँग्रेस आणि मित्रपक्षांनी निष्ठावंत कार्यकर्त्यांना उमेदवारी दिली असून त्यांना विजयी करण्याचे आवाहन त्यांनी केले. यावेळी मान्यवरांच्या हस्ते ‘विकासनामा’ प्रकाशित करण्यात आला. प्रास्ताविकातून आडळकर यांनी कॉंग्रेस आघाडीची भूमिका स्पष्ट केली. विविध मान्यवरांनी मनोगतांमधून स्थानिक भाजप व दलबदलू प्रस्थापित नेतृत्व प्रवृत्तीवर नाव न घेता जोरदार हल्लाबोल केला. सूत्रसंचालन परवेज सौदागर यांनी केले, तर आभार मिलिंद पवार यांनी मानले. नागरिकांसह महिलांची उपस्थिती होती.
