पडेगावात शिक्षक दिनी गुरुगौरव सोहळा; मान्यवरांची उपस्थिती
संस्कार आणि कष्टाची सवयच माणसाला मोठे बनवते : डॉ.विठ्ठल लहाने
परभणी : गंगाखेड तालुक्यातील पडेगाव येथे शिक्षक दिनानिमित्त संकल्प स्वराज्य उभारणी फाउंडेशनच्या वतीने शनिवारी, पाच सप्टेंबर रोजी आयोजित ‘गुरुगौरव सोहळा’ उत्साहात पार पडला. यावेळी मान्यवरांच्या हस्ते बोधचिन्हाचे अनावरण करून ‘गाव व्हावे आनंदाचे डोह’ लोकचळवळीचा शुभारंभ करण्यात आला.
कार्यक्रमाच्या अध्यक्षस्थानी इतर मागास बहुजन कल्याण मंत्री यांचे विशेष कार्य अधिकारी नानासाहेब कदम होते. प्रमुख व्याख्याते म्हणून प्लास्टिक सर्जन डॉ. विठ्ठल लहाने उपस्थित होते. व्यासपीठावर अप्पर पोलीस अधीक्षक तानाजी चिखले, सत्कारमूर्ती प्रा. विठ्ठल कांगणे, नितीन लोहट, माणिक जव्हार, अभिनेते गोपी मुंढे, उदय देशपांडे, उषाताई नितीन लोहट, डॉ. अंजली गणेश निरस, पोलीस निरीक्षक महेश लांडगे, पोलीस निरीक्षक रामेश्वर धोंडगे व शिवाजीराव बोबडे यांची उपस्थिती होती.व्याख्यानात डॉ. लहाने म्हणाले की, संस्कार आणि कष्टाची सवयच माणसाला मोठे बनवते. आई-वडील व शिक्षक हेच आयुष्याचे खरे प्रेरणास्थान असून अपयशावर मात करण्याची ताकद कष्टातूनच मिळते. तानाजी चिखले यांनी गावच्या जडणघडणीत सामूहिक प्रयत्नांची गरज अधोरेखित केली. सत्कारमूर्ती नितीन लोहट यांनी गावाच्या समृद्धीचा मार्ग शाळेतून जात असल्याचे सांगितले. प्रा. विठ्ठल कांगणे यांनी बालपण जपत श्रमदान व सहभागातून शाळा आणि गावाचा विकास साधण्याचे आवाहन केले. अध्यक्षीय भाषणात नानासाहेब कदम यांनी मतभेद विसरून ‘गाव तेथे अभ्यासिका, क्रीडांगण व आदर्श शाळा’ उभारण्याचा आणि ‘एक गाव एक स्मशानभूमी अभियान’ राबवण्याचा संदेश दिला.प्रास्ताविक श्यामसुंदर निरस यांनी केले. सूत्रसंचालन साहेबराव शिंदे परळगव्हाणकर यांनी तर आभार प्रदर्शन वाल्मीक दगडे यांनी केले. याप्रसंगी गावातील विविध उपक्रमांची डॉक्युमेंटरीही दाखवण्यात आली.
