सेलू : येथील नूतन विद्यालयातील १९७२ च्या दहावी वर्गातील माजी विद्यार्थ्यांच्या स्नेह-मिलनाचे उद्घाटन श्री बालाजी मंदिराच्या सिंदूर सभागृहात शनिवार ( दि. १३ ) रोजी दीपप्रज्वलनाने उत्साहात पार पडले. प्रारंभी दिवंगत माजी मुख्याध्यापक शंकरराव मंडलिक यांच्या प्रतिमेस पुष्पहारअर्पण करून अभिवादन करण्यात आले.
माजी नगराध्यक्ष हेमंतराव आडळकर, उद्योजक रामप्रसाद घोडके, ज्ञानेश्वर सोळंके, श्याम मणियार, मुजीब घोरी, डॉ. सुभाष परतानी, रमा सोमैय्या, माणिक रोडगे, डॉ. ईश्र्वरचंद्र हुरकट यांची व्यासपीठावर उपस्थिती होती. दोन दिवसीय स्नेह – मिलन सोहळ्यात ५८ माजी विद्यार्थी सहभागी झाले आहेत. तर ३३ माजी विद्यार्थी सपत्नीक सहभागी आहेत. स्नेह – मिलन सोहळ्यात माजी विद्यार्थ्यांनी आपले मनोगत व्यक्त केले. वर्ग मित्रांची आठवण मनात होतीच. पण जीवलग मित्रांना प्रत्यक्ष पाहून स्वर्ग सुखाचा आनंद झाला. व्हाट्सअप समुहाच्या माध्यमातून संपर्कात आलेल्या वर्ग मित्रांना ५३ वर्षांनंतर भेटण्याची सुवर्ण संधी या स्नेह- मिलनातून मिळाल्याची भावना सर्वच माजी विद्यार्थ्यांनी व्यक्त केली. स्वागतपर मनोगत हेमंतराव आडळकर यांनी व्यक्त केले. प्रास्ताविक प्राचार्य डॉ. शरद कुलकर्णी यांनी केले. सूत्रसंचालन प्रा. भगवान टेकाळे यांनी केले. तर आभार प्रदर्शन पुष्पा झंवर यांनी केले. रविवारी सकाळी आठ वाजता बालाजी मंदिर मंगल कार्यालय ते नूतन विद्यालय अशी प्रभातफेरी माजी विद्यार्थी काढणार आहेत. त्यानंतर शालेय परिसरात थांबून आपल्या आठवणींना उजाळा देणार आहेत. यानिमित्ताने गुरूजनांचा सन्मानही माजी विद्यार्थी करणार आहेत.
