राष्ट्रसंत श्री ललितप्रभजी यांच्या प्रवचनमालेला मोठा प्रतिसाद
जिंतूर : शहरातील कृषी उत्पन्न बाजार समितीच्या मैदानावर राष्ट्रसंत ललितप्रभजी यांचा प्रभावी आणि मंत्रमुग्ध करणारा सत्संग आज मोठ्या भक्तिभावात पार पडला. “राष्ट्रसंत का यह संदेश, व्यसनमुक्त हो सारा देश!” या प्रेरणादायी घोषणेने सत्संगस्थळ सकारात्मकतेच्या ऊर्जेने भारून गेले होते. राष्ट्रसंतांनी आपल्या प्रवचनात देशात वाढणाऱ्या व्यसनाधीनतेच्या प्रवाहाबद्दल तीव्र चिंता व्यक्त केली. व्यसनामुळे कुटुंबे उद्ध्वस्त होत आहेत आणि समाजात नैतिक अधःपतन वाढत आहे, असे सांगत त्यांनी युवकांना जागरूकतेचा संदेश दिला. ते म्हणाले, “नैतिकता, संयम आणि अहिंसा हीच मानवतेची खरी ओळख आहे. जेव्हा युवक व्यसनमुक्त होतात, तेव्हा कुटुंबे वाचतात आणि समाज बळकट होतो.”
राष्ट्रसंतांच्या हृदयस्पर्शी मार्गदर्शनाने भारावून गेलेल्या अनेक श्रोत्यांनी जागेवरच व्यसनमुक्तीचा दृढ संकल्प केला. या सत्संगासाठी परभणी, हिंगोली, नांदेड, संभाजीनगर, लातूर, बीड, जालना आदी जिल्ह्यांतून हजारोंच्या संख्येने भाविक जिंतूरमध्ये दाखल झाले होते. महिलांची उपस्थिती लक्षणीय होती. हा आध्यात्मिक सोहळा ब्रिजगोपालजी तोष्णीवाल परिवार आणि लोककल्याणकारी सत्संग समिती यांच्या संयुक्त विद्यमाने आयोजित करण्यात आला होता. समितीने पाणी, आसन व्यवस्था आणि सुव्यवस्था यांची उत्कृष्ट व्यवस्था केली होती.
