क्रीडा शिक्षक गायकवाड यांनी घेतले योग प्रात्यक्षिक
सेलू : तालुक्यातील जिल्हा परिषद प्राथमिक व माध्यमिक केंद्रीय कन्या शाळा, वालूर येथे आंतरराष्ट्रीय योग दिवस मोठ्या उत्साहात साजरा करण्यात आला. कार्यक्रमाच्या अध्यक्षस्थानी मुख्याध्यापक षडानन देशमाने हे होते. त्यांच्या मार्गदर्शनाखाली शालेय स्तरावर या विशेष उपक्रमाचे आयोजन करण्यात आले.
याप्रसंगी मार्गदर्शन करताना श्री.देशमाने यांनी सांगितले की, योग म्हणजे निरोगी शरीर, शांत मन आणि सशक्त जीवनाचा पाया आहे. नियमित योगाभ्यासामुळे शारीरिक क्षमता, मानसिक एकाग्रता आणि आत्मविश्वास वाढण्यास मदत होते, असे त्यांनी आपल्या भाषणात स्पष्ट केले.कार्यक्रमात क्रीडा शिक्षक रामा गायकवाड यांनी उपस्थित विद्यार्थिनींकडून विविध योगासने, प्राणायाम आणि ध्यानसाधनेची प्रात्यक्षिके करून घेतली. या उपक्रमात शाळेतील सर्व शिक्षक आणि कर्मचाऱ्यांनी स्वतः प्रात्यक्षिकांमध्ये सहभाग नोंदवून विद्यार्थिनींचा उत्साह वाढवला.
