जळगाव टेनिस व्हॉलीबॉल असोसिएशनच्या वतीने आयोजन
जळगाव : टेनिस व्हॉलीबॉल महाराष्ट्र असोसिएशन, जिल्हा क्रीडा अधिकारी कार्यालय, जळगाव आणि जळगाव जिल्हा टेनिस व्हॉलीबॉल असोसिएशन यांच्या संयुक्त विद्यमाने ३ ऑगस्ट २०२५, रविवारी जिल्हा क्रीडा संकुल, जळगाव येथे महाराष्ट्र राज्य टेनिस व्हॉलीबॉल पंच परीक्षा आणि कार्यशाळेचे आयोजन करण्यात आले होते. १६ जुलै या जागतिक टेनिस व्हॉलीबॉल दिनाचे आणि डॉ. व्यंकटेश वांगवाड यांच्या वाढदिवसाचे औचित्य साधून हा कार्यक्रम घेण्यात आला. या कार्यक्रमाला टेनिस व्हॉलीबॉल खेळाचे जनक डॉ. व्यंकटेश वांगवाड, राज्य क्रीडा मार्गदर्शक किशोर चौधरी, राज्य उपाध्यक्ष रामेश्वर कोरडे, राज्य सचिव गणेश माळवे आणि उज्वल पाटील यांची प्रमुख उपस्थिती होती.
याप्रसंगी बोलताना डॉ. व्यंकटेश वांगवाड यांनी खेळातील पंचांच्या भूमिकेवर भर दिला. ते म्हणाले की, खेळाडूंप्रमाणेच पंच हा देखील खेळाचा एक महत्त्वाचा घटक आहे, जो खेळाला योग्य न्याय देतो. पंचांनी नेहमी योग्य निर्णय घ्यावा, कारण त्यावर खेळाडूंचे भविष्य अवलंबून असते. आंतरराष्ट्रीय पंच प्रफुल्ल कुमार बनसोड यांनी टेनिस व्हॉलीबॉलचा इतिहास, नियम आणि पंचांच्या कार्याविषयी सविस्तर माहिती दिली. तर, पंच समिती सचिव निलेश माळवे यांनी गुणपत्रकाबद्दल मार्गदर्शन केले.
कार्यक्रमाचे सूत्रसंचालन जिल्हा सचिव प्रशांत कोल्हे यांनी केले. या कार्यशाळेत महाराष्ट्रातून एकूण ४५ पंच आणि क्रीडा शिक्षकांनी सहभाग घेतला होता. सहभागी झालेल्या सर्वांना प्रमाणपत्रे प्रदान करण्यात आली. यावेळी जिल्हा सचिव संदीप पाथरे, तुषार देशमुख, रामा हटकर आणि संदीप भोसले हे देखील उपस्थित होते.
