परभणी पोलीस अधीक्षक कार्यालय आणि कारखान्याचा संयुक्त उपक्रम
पाथरी : परभणी पोलीस अधीक्षक कार्यालय आणि योगेश्वरी शुगर इंडस्ट्रीज प्रा. लि., लिंबा यांच्या संयुक्त विद्यमाने रस्ते अपघात प्रतिबंधासाठी महत्त्वपूर्ण उपक्रम राबवण्यात आला. कारखान्याचे व्यवस्थापकीय संचालक ॲड.रोहित देशमुख यांच्या मार्गदर्शनाखाली कारखाना परिसरातील सर्व ट्रक व ट्रॅक्टर वाहनांना रिफ्लेक्टर बसविण्यात आले.गुरुवार, २० नोव्हेंबर रोजी वाहनचालकांसाठी रस्ते अपघात जनजागृती मोहीम घेण्यात आली. वाहन चालविताना नशा न करणे, वाहनांना रेडियम व रिफ्लेक्टर लावणे, रस्त्यावर वाहन अनियमितरीत्या न उभे ठेवणे अशा महत्त्वपूर्ण सूचना शहर वाहतूक शाखा परभणी व पाथरी पोलीस ठाण्याच्या अधिकाऱ्यांनी दिल्या.कार्यक्रमात पाथरी पोलीस स्टेशनचे पोलीस निरीक्षक लक्ष्मण केंद्रे, शहर वाहतूक शाखा परभणीचे सहाय्यक पोलीस निरीक्षक वामनराव बेले, पोलीस उपनिरीक्षक प्रकाश कुकडे यांनी मार्गदर्शन केले. रिफ्लेक्टर बसवण्याच्या उपक्रमावेळी कारखान्याचे डेप्युटी जनरल मॅनेजर राजकुमार तौर, बुलढाणा अर्बन बँकेचे विभागीय व्यवस्थापक निशांत कोचर, शेतकी अधिकारी तुकाराम झाडे, सुरक्षा अधिकारी गणेश वाघमारे, केनयार्ड सुपरवायझर गुलाब पवार, तसेच ऊसतोड वाहतूक ठेकेदार, ट्रक-ट्रॅक्टर चालक व मालक उपस्थित होते.
