पणन मंडळाची सर्व तयारी पूर्ण, शेतकऱ्यांना दिलासा
सेलू : चालू सोयाबीन हंगामाला गती मिळत असून शेतकऱ्यांच्या अपेक्षा आणि गरजा लक्षात घेऊन कृषी पणन मंडळ तसेच बाजार समित्यांनी खरेदी प्रक्रियेची संपूर्ण तयारी पूर्ण केली आहे. खरेदी केंद्रांवर सुविधा वाढविण्यात आल्या असून पारदर्शक, जलद आणि शेतकरीहिताचे व्यवहार करण्यावर विशेष भर देण्यात आला आहे. यामुळे शेतकऱ्यांना योग्य दर मिळणे आणि वेळेवर देयक मिळण्याची खात्री निर्माण झाली आहे, अशी माहिती कृषी उत्पन्न बाजार समिती सेलूचे सभापती डॉ. संजय रोडगे यांनी दिली. अतिवृष्टी, घटते उत्पादन आणि खाजगी बाजारात आलेल्या पडत्या दरामुळे आर्थिक संकटात सापडलेल्या सोयाबीन उत्पादकांसाठी ही मोठी दिलासादायक बातमी आहे. फेडरेशननंतर आता कृषी पणन मंडळानेही सोयाबीनची हमीभावाने खरेदी सुरू करण्यास हिरवा कंदील दिल्याने शेतकऱ्यांना बाजारातील दरकपातीपासून मोठा आधार मिळणार आहे.जिल्ह्यातील एकूण खरेदी केंद्रावर लवकरच खरेदी सुरू होण्याची शक्यता असून प्रत्येक केंद्रावर तोल काटे, अनलोडिंग, शेड्स, पिण्याचे पाणी, तपासणी यंत्रणा इत्यादी सर्व सुविधा उपलब्ध करून देण्यात आल्या आहेत. तसेच ऑनलाइन नोंदणी, पावती प्रिंटिंग, नमुना तपासणी आणि वजन प्रक्रिया अधिक वेगवान करण्यात आली आहे.सेलू तालुक्यातील सर्व शेतकऱ्यांनी आपला दर्जेदार सोयाबीन पणन मंडळाच्या खरेदी केंद्रावर आणून विकावा, असे आवाहन सभापती डॉ. संजय रोडगे यांनी केले आहे.
