वाढदिवशी शुभेच्छा देत सेलूतील माजी विद्यार्थ्यांनी व्यक्त केला आदरभाव
सेलू जि.परभणी : सेलू येथील नूतन विद्यालय शिक्षण संस्थेचे माजी सचिव आणि आदर्श प्राचार्य द.रा. कुलकर्णी यांनी वयाची ९४ व्या वर्षात पदार्पण केले आहे. या निमित्ताने छत्रपती संभाजीनगर येथील त्यांच्या निवासस्थानी जाऊन चाहत्यांनी आणि माजी विद्यार्थ्यांनी सत्कार करून शुभेच्छा देत आदरभाव व्यक्त केला. यावेळी साईबाबा नागरी सहकारी बँकेचे अध्यक्ष तथा माजी नगराध्यक्ष हेमंतराव आडळकर, उपाध्यक्ष चंद्रशेखर मुळावेकर, नूतन विद्यालय शिक्षण संस्थेचे प्रशासकीय अधिकारी प्राचार्य डॉ.शरद कुलकर्णी, उद्योजक विलास पौळ, इम्रान शेख, रतन दायमा, शशिकांत कुलकर्णी आदींसह मान्यवरांची उपस्थिती होती. नूतन विद्यालयाचे माजी मुख्याध्यापक रामकिशन मखमले यांनीही प्राचार्य कुलकर्णी यांना शुभेच्छा दिल्या. यांसह सेलूतील अनेकांनी फोनव्दारेही शुभेच्छा दिल्या. आहेत.
२२ जानेवारी १९३३ रोजी जन्मलेल्या प्राचार्य कुलकर्णी यांनी अर्ध्या शतकाहून अधिक काळ शैक्षणिक क्षेत्रात योगदान दिले आहे. १९६८ मध्ये त्यांनी नूतन महाविद्यालयाच्या प्राचार्यपदाची धुरा सांभाळली आणि संस्थेला मराठवाड्यात एक वेगळा लौकिक मिळवून दिला. सेवानिवृत्तीनंतरही त्यांनी १७ वर्षे संस्थेचे सचिव म्हणून कार्य पाहिले. त्यांच्या कार्यकाळात ‘आयटी पार्क’ आणि इंग्रजी माध्यमाच्या शाळांची यशस्वी उभारणी झाली. त्यांच्या या नि:स्पृह सेवेबद्दल राज्य शासनाचा ‘आदर्श शिक्षक पुरस्कार’, ‘जीवन साधना गौरव पुरस्कार’ आणि ‘सेलूभूषण’ यांसारख्या अनेक प्रतिष्ठित पुरस्कारांनी त्यांना सन्मानित करण्यात आले आहे. सेवानिवृत्तीनंतर त्यांनी आपले ज्ञान, अनुभव आणि विचारांची शब्दबद्ध केलेली, मागे वळून पाहतांना, मैत्र विचारांचे, निमित्त, ऋणानुबंध, स्मृति गंध आदी ग्रंथसंपदा सर्वांसाठी प्रेरणादायी आहे. आजही वयाच्या ९४ व्या वर्षी त्यांचा लेखनप्रवास आणि रचनात्मक कार्याचा उत्साह तरुणांसाठी प्रेरक ठरत आहे, अशा भावना माजी विद्यार्थी हेमंतराव आडळकर यांच्यासह अनेकांनी व्यक्त केल्या आहेत.
