साहित्यिकांचा सहभाग, ग्रंथदिंडी, कविसंमेलन व पुस्तकांची मोठी प्रदर्शनी
परभणी : शहरातील वसमत रोडवरील जिल्हा ग्रंथालय कार्यालयाच्या परिसरात १६ व १७ मार्च २०२६ रोजी दोन दिवसीय ग्रंथोत्सवाचे भव्य आयोजन करण्यात आले आहे. जिल्हा ग्रंथालय अधिकारी कार्यालयाच्या वतीने आयोजित हा उत्सव जिल्ह्यातील वाचनप्रेमी, विद्यार्थी आणि साहित्य रसिकांसाठी आकर्षणाचा केंद्रबिंदू ठरणार आहे.
ग्रंथोत्सवाचे उद्घाटन १६ मार्च रोजी सकाळी ११ वाजता ज्येष्ठ कवी इंद्रजीत भालेराव यांच्या हस्ते होणार असून जिल्हाधिकारी संजयसिंह चव्हाण अध्यक्षस्थानी असतील. त्यापूर्वी सकाळी ८:३० वाजता महानगरपालिका आयुक्त नितीन नार्वेकर यांच्या हस्ते ग्रंथदिंडीचे उद्घाटन होईल. यावेळी मीनाताई वरपुडकर, शिक्षणाधिकारी सविता बिरगे, जिल्हा नियोजन अधिकारी उमेश वाघमारे आणि कथाकार राजेंद्र गहाळ यांची प्रमुख उपस्थिती राहणार आहे.
या दोन दिवसांत विविध प्रबोधनात्मक कार्यक्रमांची मेजवानी मिळणार आहे. १६ मार्च रोजी दुपारी कृत्रिम बुद्धिमत्ता व साहित्य या विषयावर धर्मराज वीर मार्गदर्शन करतील, तर राम निकम यांच्या अध्यक्षतेखाली होणाऱ्या कथाकथन कार्यक्रमात राजेंद्र गहाळ व मिलिंद जाधव सहभाग घेतील. १७ मार्च रोजी सकाळी ११ वाजता प्राचार्य रामेश्वर पवार यांच्या अध्यक्षतेखाली सामाजिक जीवनात ग्रंथालयांचे महत्त्व या विषयावर परिसंवाद होईल. यात अशोक कोलंबीकर, सुभाष ढगे आणि जीवन लोखंडे आपले विचार मांडतील.
ग्रंथोत्सवाच्या दुसऱ्या दिवशी दुपारी २:३० वाजता ज्येष्ठ कवी केशव वसेकर यांच्या अध्यक्षतेखाली कविसंमेलन रंगणार आहे. सायंकाळी ४ वाजता निवासी उपजिल्हाधिकारी अनुराधा ढालकरी यांच्या अध्यक्षतेखाली समारोप समारंभ होईल. या उत्सवात विविध प्रकाशनांच्या पुस्तकांचे स्टॉल लावले जाणार असून वाचनप्रेमींना दर्जेदार पुस्तके खरेदी करण्याची संधी मिळेल. या महोत्सवाचा लाभ सर्वांनी घ्यावा असे आवाहन जिल्हा ग्रंथालय अधिकारी बाळासाहेब देवणे यांनी केले आहे.
