सेलू उपविभागीय अधिकाऱ्यांकडे तक्रार, भूमी अभिलेख कर्मचाऱ्यांच्या संगनमताने खोटा नकाशा तयार केल्याचा आरोप
सेलू : सर्व्हे नंबरमधील सर्व शेतकऱ्यांना नोटीस देऊन जमीन मोजणी करण्याचे तालुका सत्र न्यायालयाचे आदेश असताना ते डावलून मौजे डिग्रस (बु) येथील गट क्रमांक ७६ मधील शेतजमीन मोजणी केल्याची तक्रार करण्यात आली आहे.
तालुका भूमी अभिलेख कार्यालयातील कर्मचारी शेख व कटारे यांनी स्वतःच्या फायद्यासाठी गैरमार्गाचा अवलंब करून ही मोजणी केल्याबाबतची तक्रार शेतकरी शिवनारायण रामपाल मालाणी यांनी ॲड. के. एस. जोशी यांच्या मार्फत २५ मे रोजी सेलूच्या उपविभागीय अधिकाऱ्यांकडे केली आहे.तक्रारीनुसार, मौजे डिग्रस (बु) येथील गट क्रमांक ७६ मध्ये तक्रारदार यांची ४ एकर ३६ गुंठे जमीन आहे. वादी वैजनाथ बाबुराव शेळके व इतर सदस्यांनी सर्व जमीनधारकांना विचारात न घेता दिवाणी दावा दाखल केला होता. यावर सेलू दिवाणी सत्र न्यायालयाने सर्व लोकांना नोटीस देऊन १३ हेक्टर ७४ आर जमिनीची मोजणी करण्याचे आदेश वादी वैजनाथ शेळके यांना दिले होते.परंतु, न्यायालयाचे आदेश डावलून ७/१२ वरील कोणत्याही शेतकऱ्यास नोटीस न देता आणि मोजणीच्या वेळी कोणताही हिस्सेदार उपस्थित नसताना भूमी अभिलेखच्या कर्मचाऱ्यांशी संगनमत करून खोटा मोजणी अहवाल व नकाशा तयार करण्यात आला. यामध्ये महसूल संहितेच्या कलमांचे उल्लंघन झाले असून भूमी अभिलेख कार्यालयाची दिशाभूल करण्यात आली आहे. त्यामुळे कर्मचारी शेख व कटारे यांच्यावर कडक कारवाई करावी, खोटा अहवाल व नकाशा रद्द करून सर्व हिस्सेदार शेतकऱ्यांच्या उपस्थितीत जमिनीची फेरमोजणी करावी, अशी मागणी तक्रारीत करण्यात आली आहे.
फोटो : ai generated
