सेलू (परभणी) : येथील नूतन कन्या प्रशालेच्या स्व. दुर्गाताई कुलकर्णी स्मृती ग्रंथालयातील सेवानिवृत्त ग्रंथपाल डॉ. शिवाजी रामभाऊ शिंदे यांना नवी दिल्ली येथील इंटरनॅशनल अवॉर्ड कौन्सिलतर्फे ‘भारत गौरव प्रतिभा रत्न’ पुरस्काराने सन्मानित करण्यात आले.
२४ मे रोजी दिल्लीतील पंचतारांकित हॉटेल रेडिसन ब्ल्यू येथे एका भव्य सोहळ्यात हा सन्मान प्रदान करण्यात आला.या सोहळ्याला प्रमुख पाहुणे म्हणून मध्यप्रदेशचे मुख्यमंत्री (योजना) अशोक शर्माजी, सेवानिवृत्त आय.ए.एस. अधिकारी तनवीर जफरअलीजी, मुख्यमंत्री शिक्षण नियोजन तज्ज्ञ विष्णुकांत कणकणेजी, हरी ओम शर्माजी आणि सुप्रीम कोर्टाचे मुकेश कुमार त्रिपाठीजी उपस्थित होते. त्यांच्याच हस्ते डॉ. शिंदे यांना गौरविण्यात आले. निपाणी टाकळी या ग्रामीण भागातून आलेल्या डॉ. शिंदे यांनी निस्वार्थ भावनेने वाचन संस्कृती वाढवण्यासाठी मोठे योगदान दिले आहे. कोरोना काळात त्यांनी जगातील १०८ विद्यापीठांशी ग्रंथालय जोडून विविध वेबिनार घेतले, ज्याची दखल घेऊन तीन विद्यापीठांनी त्यांना डॉक्टरेट बहाल केली आहे. यापूर्वी त्यांना सुवर्ण भारत सन्मान, इंद्रप्रस्थ अवॉर्ड आणि कर्नाटक भूषण यांसारखे अनेक राष्ट्रीय पुरस्कार मिळाले आहेत.या यशाबद्दल कृतज्ञता व्यक्त करताना डॉ. शिंदे यांनी नूतन विद्यालय शिक्षण संस्थेचे अध्यक्ष डॉ. एस. एम. लोया, सचिव डी. के. देशपांडे, सचिव डॉ. व्ही. के. कोठेकर, सहसचिव जयप्रकाशजी बिहाणी, माजी सचिव प्राचार्य द. रा. कुलकर्णी , शालेय शिक्षण समितीचे अध्यक्ष नंदकिशोरजी बाहेती, संगीता खराबे आणि अनंत बोराडे यांच्यासह सर्व शिक्षक-कर्मचाऱ्यांचे आभार मानले. सेवानिवृत्तीनंतरही डॉ. शिंदे विविध शाळांना ग्रंथभेट देऊन आपले कार्य अविरतपणे पुढे चालवत आहेत.
