पावडे कुटुंबियांचा आदर्शवत उपक्रम
हदगाव पावडे/ प्रतिनिधी : जागतिक पर्यावरण दिनानिमित्त ५ जून रोजी स्व. महानंदा पावडे यांच्या पवित्र स्मृतीप्रित्यर्थ हदगाव येथे वृक्षारोपण कार्यक्रम उत्साहात झाला.पर्यावरण संवर्धनाचा संदेश देत तसेच स्वर्गीय महानंदा पावडे यांना श्रद्धांजली अर्पण करण्याच्या उद्देशाने विविध प्रकारच्या वृक्षांची लागवड करण्यात आली.
या उपक्रमाचे वैशिष्ट्य म्हणजे स्वर्गीय महानंदा पावडे यांच्या अंतिम संस्कारानंतर उरलेली राख पारंपरिक पद्धतीने नदीत विसर्जित न करता, नव्याने लावण्यात आलेल्या वृक्षांच्या मुळाशी अर्पण करण्यात आली. यामुळे वृक्षसंवर्धनाला हातभार लागण्याबरोबरच जलप्रदूषण टाळण्याचा पर्यावरणपूरक संदेशही समाजासमोर ठेवण्यात आला. “जीवनभर माणसांसाठी जगलेल्या आईच्या स्मृती आता वृक्षांच्या रूपाने समाजाला सावली, प्राणवायू आणि पर्यावरण संरक्षणाचे वरदान देतील,” अशी भावना कुटुंबीयांनी व्यक्त केली.या प्रसंगी उपस्थितांनी पर्यावरण संरक्षणाचे महत्त्व अधोरेखित करत वृक्षारोपण ही काळाची गरज असल्याचे सांगितले. वृक्ष लागवड व संवर्धनाद्वारे भावी पिढ्यांना स्वच्छ आणि निरोगी पर्यावरण देण्याचा संकल्प करण्यात आला.सदर उपक्रमाचे आयोजन संपूर्ण पावडे परिवाराच्या वतीने करण्यात आले. यामध्ये बाबासाहेब पावडे सर, भगवान पावडे सर, परमेश्वर पावडे, वसंत पावडे, अनंता महाराज पावडे, गणेश पावडे, अभिजीत, आदित्य, आयुष, अस्मिता पतरुंड अनुष्का,शीर्षा, विभू तसेच समाजसेवी व पर्यावरण मित्र रामराव गायकवाड, प्रा.पिंपळगावकर, माधव गव्हाणे, शरद ठाकर, दीपक व मित्र मंडळ यांनी सक्रिय सहभाग घेतला.कार्यक्रमादरम्यान उपस्थितांनी स्वर्गीय महानंदा पावडे यांच्या स्मृतींना अभिवादन करून पर्यावरण रक्षणासाठी प्रत्येकाने किमान एक वृक्ष लावून त्याचे संगोपन करण्याचा निर्धार व्यक्त केला. स्वर्गीय महानंदा पावडे यांच्या स्मृती जपत, हरित भविष्यासाठी एक पाऊल” या संदेशासह कार्यक्रमाची सांगता करण्यात आली.
