राष्ट्रीय कार्यात सहभागाचे आवाहन
परभणी, दि. १६ : भारत निवडणूक आयोगाच्या विशेष सखोल मतदार यादी पुनरीक्षण (SIR) कार्यक्रमांतर्गत कै. कमलताई जामकर महिला महाविद्यालयात राष्ट्रीय सेवा योजनांच्या (NSS) विद्यार्थ्यांसाठी प्रशिक्षण कार्यक्रम उत्साहात पार पडला. या कार्यक्रमात विद्यार्थ्यांनी मोठ्या संख्येने सहभाग घेत एसआयआर मोहिमेत बीएपलओंना सहकार्य करण्याचा संकल्प केला.
हा प्रशिक्षण कार्यक्रम उपजिल्हाधिकारी (निवडणूक) अरुणा संगेवार व उपविभागीय अधिकारी उदयसिंह भोसले यांच्या मार्गदर्शनाखाली, नोडल अधिकारी प्रा. गणेश शिंदे यांच्या नियोजनातून आयोजित करण्यात आला. कार्यक्रमाच्या अध्यक्षस्थानी प्राचार्य डॉ. रामचंद्र भिसे होते. यावेळी एसआयआर पथकातील अरविंद शहाणे, मोहन आल्हाट, प्रफुल्ल शहाणे, त्र्यंबक वडसकर, रामप्रसाद अवचार आदी उपस्थित होते.
प्राचार्य डॉ. भिसे यांनी विद्यार्थ्यांना मार्गदर्शन करताना सांगितले की, देशसेवा करण्यासाठी मोठ्या संधींचीच गरज नसते. छोट्या-छोट्या कृतींमधूनही राष्ट्रीय कार्यात मोलाचे योगदान देता येते. मतदार यादी विशेष सखोल पुनरीक्षण मोहिमेत सहभागी होऊन विद्यार्थ्यांनी लोकशाही अधिक सक्षम करण्यासाठी पुढाकार घ्यावा, असे त्यांनी आवाहन केले.
यानंतर एसआयआर पथकातील अरविंद शहाणे, मोहन आल्हाट आणि प्रफुल्ल शहाणे यांनी एसआयआर प्रक्रियेची, गणना फॉर्मची तसेच बीएलओंना आवश्यक असलेल्या सहकार्याची सविस्तर माहिती दिली. विद्यार्थ्यांनी आपल्या परिसरातील बीएलओंना मदत करून मतदार यादी अद्ययावत करण्याच्या राष्ट्रीय कार्यात सक्रिय सहभाग नोंदवावा, असे त्यांनी सांगितले. कार्यक्रमाच्या शेवटी विद्यार्थ्यांनी एसआयआर मोहिमेत सक्रिय सहभाग घेऊन बीएलओंना सहकार्य करण्याचा संकल्प व्यक्त केला.
कार्यक्रमाच्या यशस्वी आयोजनासाठी प्रा. डॉ. रवींद्र इंगळे, प्रा. डॉ. ओमप्रभा लोकरे, प्रा. डॉ. संगीता आवचार, प्रा. डॉ. पल्लवी कुलकर्णी, प्रा. डॉ. संगीता लोमटे, प्रा. आशा गिरी, प्रा. अश्विनी चाणमारे, प्रा. माधुरी देशमुख, प्रा. निकिता कुलकर्णी, प्रा. कांचन शर्मा, प्रा. कौसर बेगम आदींनी परिश्रम घेतले.
