सभासदांना १० टक्के दराने लाभांश वाटप; गुणवंतांचा सत्कार
सेलू : येथील नूतन विद्यालय कर्मचारी सहकारी पतपेढी मर्यादित, सेलूची ६४ वी वार्षिक सर्वसाधारण सभा अध्यक्ष तथा मुख्याध्यापक एस.व्ही.पाटील यांच्या अध्यक्षतेखाली बुधवारी, २२ जुलै २०२६ रोजी उत्साहात संपन्न झाली. या सभेत संस्थेच्या प्रगतीचा आढावा घेण्यात आला असून सभासदांना १० टक्के दराने लाभांश वाटप करण्यात आला.
नूतन कन्या प्रशालेतील कमलाबाई आसारामजी बाहेती सभागृहात दुपारी चार वाजता सभेला सुरुवात झाली. व्यासपीठावर उपाध्यक्ष ई. डी. जाधव, सचिव एस. बी. देशपांडे, सहसचिव बी. आर. पानझाडे, खजिनदार ए. टी. बोराडे, मुख्याध्यापिका एन.डी.पाटील, उल्हास पांडे आणि संचालकांची उपस्थिती होती.
यावेळी मार्गदर्शन करताना अध्यक्ष श्री.पाटील म्हणाले की, नूतन विद्यालय शिक्षण संस्थेचे अध्यक्ष डॉ.एस. एम. लोया, उपाध्यक्ष डी. के. देशपांडे, सचिव प्राचार्य डॉ.व्ही. के. कोठेकर आणि सहसचिव जयप्रकाशजी बिहाणी यांच्या मार्गदर्शनाखाली पतपेढीचे कामकाज यशस्वीरीत्या सुरु आहे. सर्व सभासदांच्या पाठबळावर आणि संचालक मंडळाच्या नियोजनामुळे संस्थेने आर्थिक वर्षात भरीव प्रगती साधली आहे.
यावेळी इयत्ता १० वी, १२ वी, शिष्यवृत्ती परीक्षा व क्रीडा क्षेत्रात प्राविण्य मिळवणाऱ्या पाल्यांचा तसेच निवृत्त सभासदांचा सत्कार करण्यात आला. सचिव एस.बी.देशपांडे यांनी अहवाल सादर केला. ३१ मार्च २०२६ अखेरची संस्थेची आर्थिक स्थिती मांडली.
पतपेढीला ऑडिट वर्ग ‘ब’ प्राप्त असून वार्षिक लेखापरीक्षण श्रीपाद रोडगे यांनी केल्याचे त्यांनी सांगितले. सभेला संचालक बी. एन. पदमावत, बी. एस. हेलसकर, एस. आर. तोडकर, ए. आर. कुलकर्णी, ए. ए. सुभेदार, एस. यु. कुंडीकर, आर. पी. आंबेकर, एस. के. सुक्ते, पी. के. सावरगावकर, सौ. के. व्ही. चौधरी, वाय. एम. कुलकर्णी यांच्यासह सभासद उपस्थित होते. कार्यक्रम यशस्वीतेसाठी शिक्षक, तसेच कर्मचारी केशव डहाळे, अरूण रामपुरकर यांनी सहकार्य केले.
