मुख्यमंत्री देवेंद्र फडणवीस यांच्या वाढदिवसानिमित्त ‘देववन मियावाकी’ उद्यानाचे लोकार्पण
देशनिष्ठ प्रतिनिधी, सेलू जि.परभणी : मराठवाड्याचे पुणे म्हणून ओळखल्या जाणाऱ्या सेलू शहरात पर्यावरण संवर्धनाला मोठा वेग मिळत आहे. राज्याचे मुख्यमंत्री देवेंद्र फडणवीस आणि पालकमंत्री मेघना साकोरे-बोर्डीकर यांच्या मार्गदर्शनाखाली आपल्या कार्यकाळात सेलू शहर ‘हरित नगरी’ बनवण्याचे स्वप्न पूर्ण करणार असल्याची ग्वाही नगराध्यक्ष मिलिंद सावंत यांनी दिली.
मुख्यमंत्री देवेंद्र फडणवीस यांच्या वाढदिवसानिमित्त पालकमंत्री मेघना साकोरे-बोर्डीकर यांच्या संकल्पनेतून बुधवारी, २२ जुलै रोजीजिल्ह्यातील ५५ हजार वृक्षलागवडीचा उपक्रम राबवण्यात आला. या अभियानांतर्गत सेलूतील सरस्वती शिक्षक कॉलनीतील १ एकर जागेत उभारण्यात येत असलेल्या ‘देववन मियावाकी’ उद्यानाचा शुभारंभ करण्यात आला. या ठिकाणी ५ हजार ५०० रोपांची लागवड करण्यात आली आहे. या रोपांच्या संगोपनाची जबाबदारी नगरपालिकेने स्वीकारली असली तरी नागरिकांनीही संवर्धनासाठी पुढाकार घ्यावा, असे आवाहन नगराध्यक्ष सावंत यांनी केले.
मुंबई येथील ‘ग्राम सामाजिक परिवर्तन अभियाना’चे मुख्य कार्यकारी अधिकारी दिलीपसिंग बायस यांच्या हस्ते या उद्यानाचे उद्घाटन झाले. कार्यक्रमास उपनगराध्यक्ष साईराज बोराडे, माजी नगराध्यक्ष विनोद बोराडे, पालकमंत्री ओएसडी अनिकेत पालेपवाड, मुख्याधिकारी महेश गायकवाड, भाजप तालुकाध्यक्ष गणेश काटकर, शहराध्यक्ष अशोक शेलार, डॉ. संजय हरबडे, नगरसेवक मनिष कदम, नितीन पहाडे, तडवी पठाण, निर्मला लिपणे, संध्या चिटणीस, भाऊसाहेब सोनवणे, रामेश्वर काजळे, प्रशांतसिंह ठाकुर, सुनील गायकवाड आदींसह मान्यवर उपस्थित होते.
कार्यक्रमाच्या सुरुवातीला दिवंगत उपमुख्यमंत्री अजितदादा पवार यांना जयंतीनिमित्त अभिवादन करण्यात आले. सूत्रसंचालन सुभाष मोहकरे यांनी केले तर आभार मुख्याधिकारी महेश गायकवाड यांनी मानले. उपमुख्याधिकारी बी.एस.चव्हाण आणि नगर पालिका कर्मचाऱ्यांनी कार्यक्रमाच्या यशस्वीतेसाठी परिश्रम घेतले.
