मंगरूळपीर येथील जिल्हा व सत्र न्यायालयाचा निकाल
देशनिष्ठ प्रतिनिधी, मंगरूळपीर : देपूळ ता. वाशिम येथील एका महिलेसह तिच्या नातवाला जुन्या वादातून जिवे मारण्याचा प्रयत्न करणाऱ्या पिता-पुत्राला येथील जिल्हा व सत्र न्यायाधीश प्रज्ञा एस. काळे यांनी प्रत्येकी पाच-पाच वर्षांचा सश्रम कारावासाची शिक्षा सुनावली आहे. तसेच प्रत्येकी २५ हजार रुपयांचा दंड ठोठावला असून या रकमेपैकी ४० हजार रुपये यातील जखमी समाधान वाघमारे यास देण्याचे आदेश दिले आहेत.
मंगरूळपीर तालुक्यातील आसेगाव पोलीस ठाण्याच्या हद्दीतील देपूळ गावात दि. १२ फेब्रुवारी २०२२ रोजी आरोपी मोसीन शहा मन्सूर शहा आणि मन्सूर शहा गुलाब शहा यांनी लक्ष्मीबाई तुळशीराम वाघमारे हिचा नातू समाधान शालिकराम वाघमारे यांना जुन्या वादातून कुऱ्हाड व सूरीने गंभीर वार करून जीव घेण्याचा प्रयत्न केला. त्यानंतर आसेगाव पोलीस ठाण्यात चार आरोपी विरुद्ध भादंवि च्या कलम ३०७,३२३, ५०४, ५०६, ३४ नुसार गुन्हा दाखल झाला.
याप्रकरणी मंगरूळपीर येथील जिल्हा व सत्र न्यायाधीश प्रज्ञा एस. काळे यांच्या न्यायालयात यामध्ये सुनावणी झाली. यामध्ये एकूण दहा साक्षीदार तपासण्यात आले. न्यायाधीशांनी दोन्ही बाजूंचा युक्तिवाद ऐकला. चार आरोपींपैकी दोन आरोपीतांविरुद्ध गुन्हा सिद्ध झाल्याने न्यायाधीश प्रज्ञा एस. काळे यांनी पाच -पाच वर्षांच्या कारावासाची शिक्षा सुनावली. तसेच प्रत्येकी २५ हजार रुपयांचा दंडही ठोठावला. सबळ पुराव्याअभावी शागिराबी मन्सूर शहा आणि सलमाबी ऊर्फ माया अख्तर शहा यांची निर्दोष मुक्तता केली. तसेच नुकसान भरपाई म्हणून जखमी समाधान शालिकराम वाघमारे यांना दंडाची रक्कम ४० हजार रुपये देण्याचे आदेश दिले.
या प्रकरणात सरकारच्या वतीने अतिरिक्त शासकीय अभियोक्ता एस. के. गिमेकर यांनी शासनाची बाजू प्रभावीपणे मांडली. पोलीस उपनिरीक्षक आर. व्ही. खंदारे यांनी या गुन्ह्याचा तपास केला. महिला पोलीस कॉन्स्टेबल (एलपीसी) परविन भुरीवाले यांनी पैरवी अधिकारी म्हणून काम पाहिले.
