शेलगाव शिवार परिसरातील घटना; तातडीने दुरुस्ती करण्याची नागरिकांची मागणी
मंगरुळपीर (फुलचंद भगत) : मंगरुळपीर लगतच्या शेलगाव ग्रामपंचायत हद्दीतील वाशिम पेट्रोल पंपाजवळील कॉलनीकडे जाणाऱ्या मुख्य रस्त्यावरील हायवेच्या बाजूच्या नालीवरील रपटा अनेक दिवसांपासून तुटलेल्या अवस्थेत आहे. त्यामुळे या भागातील नागरिकांना तसेच वाहनधारकांना मोठ्या अडचणींचा सामना करावा लागत आहे.
या मार्गावरून दररोज शेकडो नागरिक, विद्यार्थी तसेच लहान-मोठी वाहने ये-जा करतात. परंतु, रपटा कोसळल्याने रस्त्यावर मोठा खड्डा निर्माण झाला असून वाहतुकीस अडथळा निर्माण होत आहे. विशेषतः रात्रीच्या वेळी आणि पावसाळ्यात शाळकरी मुले, ज्येष्ठ नागरिक आणि महिलांना जीव मुठीत धरून प्रवास करावा लागत आहे.स्थानिक नागरिकांनी वारंवार लक्ष वेधूनही प्रशासनाकडून अद्याप कोणतीही ठोस कारवाई झालेली नाही. एखादी गंभीर दुर्घटना घडल्यानंतरच प्रशासन जागे होणार का, असा संतप्त सवाल रहिवाशांकडून उपस्थित केला जात आहे.
संबंधित प्रशासनाने वेळेत दखल घेऊन तुटलेल्या रपट्याची तातडीने दुरुस्ती करावी, सुरक्षित काँक्रीटचा रपटा उभा करावा आणि तोपर्यंत अपघात टाळण्यासाठी या ठिकाणी बॅरिकेड्स व धोक्याचे फलक लावावेत, अशी आग्रही मागणी शेलगाव परिसरातील नागरिकांनी केली आहे.
