पुरस्कारप्राप्त शिक्षकांच्या नामफलकाबाबत निवेदन; सकारात्मक कार्यवाहीचे आश्वासन
परभणी : येथील राज्य राष्ट्रीय शिक्षक संघाच्या वतीने प्राथमिक विभागाच्या नूतन शिक्षणाधिकारी श्रद्धा झिंजूरके यांचा ३१ ऑगस्ट रोजी सत्कार करण्यात आला. या वेळी विविध मागण्यांचे निवेदन त्यांना देण्यात आले.
या प्रसंगी उपशिक्षणाधिकारी तथा सेलूचे गटशिक्षणाधिकारी गजानन वाघमारे, राज्य राष्ट्रीय पुरस्कार प्राप्त संघाचे जिल्हाध्यक्ष योगेश ढवारे, उपाध्यक्ष छाया गायकवाड, जिल्हा सचिव शिवप्रसाद मठपती, सहसचिव रत्नमाला शेळके व मुख्य संघटक संतोष चिद्रवार यांची प्रमुख उपस्थिती होती.या प्रसंगी श्रद्धा झिंजूरके यांचा शाल, योगेश ढवारे लिखित भाषण एक कला ही पुस्तिका व वृक्ष भेट देऊन सन्मान करण्यात आला.प्राथमिक व माध्यमिक शिक्षण विभागात राष्ट्रीय व राज्य पुरस्कार प्राप्त शिक्षकांच्या नावांचे फलक लावणे ही या निवेदनाची प्रमुख मागणी होती. जिल्हा परिषद परभणी अंतर्गत कार्यरत असलेल्या अनेक शिक्षकांना त्यांच्या उत्कृष्ट शैक्षणिक कार्याबद्दल राज्य शासन तसेच भारत सरकारच्या वतीने राज्य आदर्श शिक्षक पुरस्कार व राष्ट्रीय शिक्षक पुरस्कार प्रदान करण्यात आले आहेत. या पुरस्कारांमुळे केवळ त्या शिक्षकांचाच नव्हे, तर संपूर्ण जिल्ह्याचा गौरव वाढलेला आहे.पुरस्कारप्राप्त शिक्षकांच्या कार्याचा सन्मान व्हावा, नवोदित शिक्षकांना प्रेरणा मिळावी तसेच विद्यार्थी, पालक व नागरिकांना जिल्ह्याच्या शैक्षणिक गुणवत्तेची माहिती व्हावी, या उद्देशाने जिल्हा परिषद परभणी येथील प्राथमिक, माध्यमिक व योजना विभागाच्या कार्यालयांमध्ये वाशीम, हिंगोली, नागपूर या जिल्ह्यांप्रमाणे आकर्षक सन्मान फलक लावण्यात यावा, अशी मागणी निवेदनात करण्यात आली. या फलकावर शिक्षकांचे नाव, शाळेचे नाव, पुरस्काराचे वर्ष व छायाचित्र समाविष्ट करावे, अशी विनंती करण्यात आली आहे.या उपक्रमामुळे उत्कृष्ट कार्य करणाऱ्या शिक्षकांचा गौरव होईल, गुणवत्तापूर्ण शैक्षणिक कार्यास प्रोत्साहन मिळेल आणि इतर शिक्षकांनाही प्रेरणा मिळून शिक्षण क्षेत्रात सकारात्मक वातावरण निर्माण होईल, असा विश्वास व्यक्त करण्यात आला. शिक्षणाधिकारी श्रद्धा झिंजूरके यांनी या उपक्रमास शुभेच्छा देत शिक्षण विभागात असा सन्मान फलक निश्चित लावला जाईल, असे सकारात्मक आश्वासन शिष्टमंडळास दिले.
