वालूर जिप कन्या शाळेच्या शिरपेचात मानाचा तुरा; विद्यार्थीनीसह पालक शिक्षकांकडून अभिनंदनाचा वर्षाव
सेलू : भारताचे माजी राष्ट्रपती डॉ. सर्वपल्ली राधाकृष्णन यांच्या जयंतीनिमित्त जिल्हा परिषद केंद्रीय प्राथमिक व माध्यमिक कन्या शाळा वालूर येथे शिक्षक दिन उत्साहात साजरा करण्यात आला. या प्रसंगी जिल्हास्तरीय उत्कृष्ट शिक्षक पुरस्कार २०२६ प्राप्त झाल्याबद्दल मुख्याध्यापक षडानन शंकरराव देशमाने यांचा गौरव व सत्कार समारंभ शनिवारी, ५ सप्टेंबर २०२६ रोजी जल्लोषात साजरा करण्यात आला. या यशामुळे कन्या शाळेच्या शिरपेचात मानाचा तुरा रोवला गेला असून संपूर्ण वालूर शाळा परिवाराची मान उंचावली आहे.
कार्यक्रमाच्या अध्यक्षस्थानी बळीराम धरणे होते. प्रमुख पाहुणे म्हणून रामभाऊ पाथरकर, रुक्मिणी मगर, स्वाती टेहरे, मौजम आणि कदम यांची उपस्थिती लाभली. कार्यक्रमाचे प्रभावी सूत्रसंचालन सानिका रुपनर यांनी केले. प्रास्ताविकातून बबनराव राठोड यांनी शिक्षक दिनाचे महत्त्व विशद करून षडानन देशमाने यांच्या शैक्षणिक कार्यावर प्रकाश टाकला. विद्यार्थिनींच्या वतीने श्रेया शिंगारे व गौरी बिहाडे यांनी मनोगतातून कृतज्ञता व्यक्त केली. नानासाहेब पवार व कुलकर्णी यांनी देशमाने यांच्या शैक्षणिक बांधिलकीचे आणि शाळेच्या प्रगतीतील योगदानाचे कौतुक केले. मान्यवरांच्या हस्ते षडानन देशमाने व अंजली देशमाने यांचा शाल, श्रीफळ, भेटवस्तू व पुष्पगुच्छ देऊन सत्कार करण्यात आला. विद्यार्थिनींनी नृत्याच्या माध्यमातून आनंद व्यक्त केला.
सत्काराला उत्तर देताना हा पुरस्कार वैयक्तिक नसून सहकारी शिक्षक, विद्यार्थिनी, पालक, व्यवस्थापन समिती आणि समाज घटकांचा सहभाग असल्याचे षडानन देशमाने यांनी नमूद केले. शालेय व्यवस्थापन समिती व रामभाऊ पाथरकर यांच्या वतीने शाळेतील सर्व शिक्षकांचा भेटवस्तू देऊन सन्मान करण्यात आला.
अध्यक्षीय भाषणात श्री.धरणे यांनी शिक्षकाचे कर्तृत्व विद्यार्थ्यांच्या प्रगतीत प्रतिबिंबित होते असे सांगितले. कार्यक्रमाच्या शेवटी प्रदीप जोशी यांनी उपस्थितांचे आभार मानले. शिक्षक दिन आणि पुरस्कार सोहळ्यामुळे वालूर कन्या शाळेत दुहेरी आनंद साजरा झाला. कार्यक्रमाच्या यशस्वीतेसाठी सर्व शिक्षक वृंद व विद्यार्थिनींनी परिश्रम घेतले.
