श्री केशवराज बाबासाहेब विद्यालयातील ३६ गरीब व होतकरू विद्यार्थ्यांना गणवेश भेट; शैक्षणिक व सामाजिक वर्तुळातून कौतुक
सेलू : आजच्या आधुनिक युगात सगळीकडे आपल्याला पुरता स्वार्थी विचार करण्याची वृत्ती बळावत असताना वाढदिवसदेखील मोठ्या प्रमाणावर साजरा केला जातो, पण येथील प्रभाग क्रमांक ४ मधील नगर सेवक दीपक कोल्हाळ यांनी वाढदिवसाच्या निमित्ताने आपण समाजाचे देणे लागतो या उदात्त हेतूने श्री केशवराज बाबासाहेब विद्यालयातील गरीब व होतकरु विदयार्थ्यांना शालेय गणवेश वाटप करून एक आदर्श पायंडा प्रस्थापित केला आहे.
या प्रसंगी ३६ विद्यार्थ्यांना शालेय गणवेश वाटप करण्यात आला.कार्यक्रमाच्या प्रसंगी मुख्याध्यापक संजय धारासुरकर, किशोर खारकर, ज्येष्ठ शिक्षक दिलीप बेदरकर, दिपक कोल्हाळ, शिवाजी जाधव तसेच मित्र मंडळी यांची उपस्थिती होती. शुभेच्छापर मनोगतात संजय धारासुरकर यांनी दिपक कोल्हाळ यांना वाढदिवसाच्या शुभेच्छा देत या पुढेहीं शाळेला असेच सहकार्य करण्याचे आवाहन केले.या कार्यक्रमाचे सूत्रसंचालन योगेश ढवारे यांनी केले तर आभार कृष्णा पांचाळ यांनी मानले. हा कार्यक्रम यशस्वी करण्यासाठी ज्येष्ठ शिक्षिका अमिता जवळेकर, कीर्ती कुलकर्णी, रुपाली कुर्डे, स्वप्नील सुरुसे, धीरज दूधगोंडे, सेवक विठ्ठल काळे, बाबासाहेब बदाले आणि श्याम मुंडे यांनी परिश्रम घेतले.
