परभणीत अखिल भारतीय ग्राहक पंचायतच्या ऑनलाईन सदस्य नोंदणी अभियानाचा शुभारंभ
परभणी | प्रतिनिधी : अखिल भारतीय ग्राहक पंचायतच्या देवगिरी प्रांतात सुरू करण्यात आलेल्या ऑनलाईन सदस्य नोंदणी अभियानाचा शुभारंभ शनिवारी १ ऑगस्ट २०२६ रोजी परभणी येथे उत्साहात संपन्न झाला. या अभियानाच्या निमित्ताने कै. सौ. कमलताई जामकर महिला महाविद्यालयाच्या सभागृहात जिल्हास्तरीय बैठकीचे आयोजन करण्यात आले होते. या बैठकीत मोठ्या संख्येने पदाधिकारी व कार्यकर्त्यांनी उपस्थित राहून ऑनलाईन सदस्य नोंदणी करून अभियानाला सक्रिय प्रारंभ केला.
बैठकीच्या प्रारंभी मान्यवरांच्या हस्ते स्वामी विवेकानंद यांच्या प्रतिमेचे पूजन करून कार्यक्रमाची सुरुवात करण्यात आली. यावेळी महाविद्यालयाचे प्राचार्य डॉ. रामचंद्र भिसे, अखिल भारतीय ग्राहक पंचायत देवगिरी प्रांताचे अध्यक्ष डॉ. विलास मोरे, पर्यावरण आयाम प्रमुख डॉ. संगीता आवचार, प्रा. माधुरी देशमुख, जिल्हाध्यक्ष गुलाबराव शिंदे, जिल्हा सचिव डॉ. संदीप चव्हाण, उपाध्यक्ष भगवान करंजे, के. बी. शिंदे, भानुदास शिंदे, अब्दुल रहीम, बाबासाहेब भोसले, चंद्रकांत गवळी, माधवराव चौरे यांच्यासह अनेक पदाधिकारी व कार्यकर्ते उपस्थित होते.यावेळी मार्गदर्शन करताना डॉ. विलास मोरे यांनी अखिल भारतीय ग्राहक पंचायत ही ग्राहकांच्या हक्कांसाठी सातत्याने कार्य करणारी देशव्यापी संघटना असून, संघटनेची ताकद वाढविण्यासाठी सदस्य नोंदणी अत्यंत महत्त्वाची असल्याचे सांगितले.
संघटनेचे कार्य अधिक व्यापक करण्यासाठी प्रत्येक गावात ग्राहक पंचायतची स्थापना करण्यावर भर देण्यात येणार असून, “गाव तिथे ग्राहक पंचायत” हा उपक्रम प्रभावीपणे राबविण्यासाठी सर्व कार्यकर्त्यांनी पुढाकार घ्यावा, असे आवाहन त्यांनी केले.ग्राहक संरक्षण, जनजागृती, ग्राहक शिक्षण, तक्रार निवारण तसेच ग्राहकांच्या हक्कांसाठी संघटितपणे कार्य करण्यासाठी मोठ्या प्रमाणात सदस्य नोंदणी होणे आवश्यक असल्याचे त्यांनी स्पष्ट केले. ऑनलाईन सदस्य नोंदणीमुळे संघटनेचे कार्य अधिक गतिमान, पारदर्शक आणि सर्वसामान्यांपर्यंत पोहोचण्यास मदत होईल, असेही त्यांनी सांगितले.
बैठकीत उपस्थित पदाधिकारी व कार्यकर्त्यांनी प्रत्यक्ष ऑनलाईन सदस्य नोंदणी करून अभियानाला उत्स्फूर्त प्रतिसाद दिला. आगामी काळात परभणी जिल्ह्यातील प्रत्येक तालुका व गावांमध्ये विशेष सदस्य नोंदणी अभियान राबविण्याचा तसेच ग्राहक चळवळ अधिक मजबूत करण्याचा निर्धार यावेळी व्यक्त करण्यात आला.बैठकीमुळे परभणी जिल्ह्यात अखिल भारतीय ग्राहक पंचायतच्या ऑनलाईन सदस्य नोंदणी अभियानाला प्रभावी सुरुवात झाली असून, जिल्हाभरात या अभियानाला व्यापक प्रतिसाद मिळेल, असा विश्वास उपस्थितांनी व्यक्त केला.
