वाशिममध्ये स्थानिक गुन्हे शाखेची धडक कारवाई; सिनेस्टाईल पाठलाग करून तिघांना घेतले ताब्यात
देशनिष्ठ प्रतिनिधी, वाशिम (फुलचंद भगत) : जिल्ह्यात कायदा आणि सुव्यवस्था अबाधित राखण्यासाठी राबवल्या जाणाऱ्या रात्रगस्तीदरम्यान स्थानिक गुन्हे शाखेने काटा रोडवर मोठी कारवाई केली. गोपनीय माहितीच्या आधारे पोलिसांनी पाठलाग करून तीन संशयितांना ताब्यात घेतले. अंगझडतीदरम्यान आरोपी लखन संतोष जाधव (वय २३, रा. झाकलवाडी), रोशन प्रवीण खोडे (वय २१, रा. वाशिम) व करण महादेव घुले (वय २१, रा. झाकळवाडी) यांच्याकडून एक पिस्टल आणि ०५ जिवंत काडतुसे जप्त करण्यात आली. विनापरवाना शस्त्र बाळगल्याप्रकरणी वाशिम शहर पोलीस ठाण्यात गुन्हा दाखल करण्यात आला आहे.
पोलीस अधीक्षक निकेश खाटमोडे-पाटील, अपर पोलीस अधीक्षक श्रीमती लता फड, उपविभागीय पोलीस अधिकारी रामकृष्ण पवार व स्थानिक गुन्हे शाखा वाशिमचे पोलीस निरीक्षक सुधाकर आडे यांच्या मार्गदर्शनाखाली ही कारवाई झाली. या कारवाईत सपोनि योगेश धोत्रे, पोहवा गजानन झगरे, ज्ञानदेव मात्रे, पोअंम अमोल इरतकर, संतोष वाघ, महिला पोहवा कविता गायकवाड आणि चापोअंम सुनील तायडे यांनी महत्त्वाची कामगिरी बजावली. शस्त्र कोठून आणले याचा अधिक तपास सुरू आहे.
नागरिकांनी कोणतीही संशयास्पद व्यक्ती, अवैध शस्त्र बाळगणारी व्यक्ती अथवा गुन्हेगारीविषयी माहिती असल्यास त्वरित जवळच्या पोलीस ठाण्याशी किंवा पोलीस नियंत्रण कक्ष वाशिम यांच्याशी संपर्क साधून सहकार्य करावे, असे आवाहन पोलीस प्रशासनामार्फत करण्यात येत आहे.
