परभणी, दि. २१ (प्रतिनिधी) : प्रधानमंत्री आवास योजनेच्या पुढील हप्त्याची फाईल मंजूर करण्यासाठी लाच स्वीकारल्याप्रकरणी लाचलुचपत प्रतिबंधक विभागाने (एसीबी) परभणी तालुक्यातील किन्होळा येथील ग्रामविकास अधिकारी आम्रपाली लक्ष्मणराव काकडे यांना बुधवारी (दि. २०) रंगेहाथ पकडले.
या प्रकरणाची अधिक माहिती अशी की, तक्रारदार आणि त्यांच्या आईच्या घरकुलाचा पुढील हप्ता मंजूर करण्यासाठी आरोपी ग्रामविकास अधिकारी काकडे यांनी प्रत्येकी पाच हजार रुपयांची, अशी एकूण १०,००० रुपयांची लाच मागितली होती. तक्रारदारांनी याबाबत लाचलुचपत प्रतिबंधक विभागाकडे तक्रार दाखल केली.
त्यानंतर, तडजोडीअंती प्रत्येकी चार हजार रुपये, असे एकूण ८,००० रुपये लाच स्वीकारताना एसीबीच्या पथकाने त्यांना परभणी शहरातील कारेगाव रस्त्यावरील त्यांच्या राहत्या घरातून ताब्यात घेतले. या कारवाईदरम्यान आरोपीचा मोबाईल फोन जप्त करण्यात आला असून, त्यांच्या घराचीही झडती सुरू आहे. आरोपीविरोधात नवा मोंढा पोलीस ठाण्यात भ्रष्टाचार प्रतिबंधक अधिनियमांतर्गत गुन्हा दाखल करण्यात आला आहे.
ही कारवाई लाचलुचपत प्रतिबंधक विभागाचे पोलीस अधीक्षक संदीप पालवे आणि अप्पर पोलीस अधीक्षक डॉ. संजय तुंगार यांच्या मार्गदर्शनाखाली पोलीस उपाधीक्षक महेश पाटणकर, अल्ताफ मुलानी, मनीषा पवार आणि त्यांच्या पथकाने यशस्वीपणे पार पाडली.
