आरोपीला १ महिन्याचा कारावास आणि धनादेशाच्या दुप्पट ₹ १,१६,२०० नुकसान भरपाईचे निर्देश
सेलू : धनादेश अनादर प्रकरणी सेलू येथील सह न्यायदंडाधिकारी प्रथम वर्ग न्यायालयाचे न्यायाधीश श्री. वैभव आर. गटकळ यांनी शेख नासेर शेख नबी या आरोपीस दोषी ठरवून शिक्षा सुनावली आहे. आरोपीस धनादेश अनादराबद्दल १ महिन्याचा साधा कारावास तसेच धनादेशाच्या रकमेच्या दुप्पट रक्कम, म्हणजेच ₹ १,१६,२०० (एक लाख सोळा हजार दोनशे रुपये), आणि प्रकरणाचा खर्च म्हणून फिर्यादी बँकेस ₹ १०,००० (दहा हजार रुपये) १ महिन्यात देण्याचा महत्त्वपूर्ण आदेश दिनांक १६.१०.२०२५ रोजी पारित केला आहे.
याबाबतची हकीकत अशी आहे की, सेलू येथील देवगिरी नागरी सहकारी बँक मर्यादित, औरंगाबाद शाखा यांच्याकडून आरोपी शेख नासेर शेख नबी यांनी घेतलेली रक्कम परतफेड केली नव्हती. बँकेने वसुलीसाठी पाठपुरावा केल्यानंतर आरोपीने बाकी रकमेपैकी ₹ ५८,२०० (अठ्ठावन्न हजार दोनशे रुपयांचा) धनादेश बँकेच्या हक्कात दिला. सदरील धनादेश बँकेने वटविण्यासाठी दिला असता, आरोपीच्या खात्यात पुरेशी रक्कम नसल्यामुळे तो धनादेश अनादर झाला.
त्यानंतर बँकेच्या वकिलामार्फत कायदेशीरपणे रक्कम मिळण्यासाठी आरोपीस नोटीस पाठवण्यात आली. नोटीस देऊनही मुदतीत रक्कम न दिल्यामुळे बँकेतर्फे धनादेश अनादराबद्दल Negotiable Instruments Act (निगोशिएरबल इन्स्ट्रुमेंट कायदा) च्या कलम १३८ अन्वये न्यायदंडाधिकारी प्रथम वर्ग सेलू येथे प्रकरण दाखल करण्यात आले होते. वकिलाचा युक्तिवाद ग्राह्य धरून न्यायालयाने आरोपीस धनादेश अनादर झाल्याबद्दल प्रकरण सिद्ध झाल्यामुळे दोषी ठरवून शिक्षा सुनावली. न्यायालयाने दिलेल्या आदेशानुसार, जर उपरोक्त रक्कम १ महिन्यात न दिल्यास, १ महिन्याचा अतिरिक्त कारावास भोगावा लागेल. फिर्यादी देवगिरी नागरी बँक, औरंगाबाद शाखा, सेलूच्या वतीने ॲड. एल. एच. खोना यांनी यशस्वीरित्या बाजू मांडली.
