रांजणी येथे विविध कार्यक्रम
रांजणी : घनसावंगी तालुक्यातील रांजणी येथील महावीर जैन मंदिरात सोमवारी भगवान महावीर यांची जयंती मोठ्या उत्साहाने आणि भक्ती भावाने साजरी करण्यात आली. या निमित्ताने जैन मंदिरात भगवान महावीर यांची पूजा, अर्चना, अभिषेक, पाळणा, सामुदायिक आरती व नमोकार मंत्र जाप असे विविध धार्मिक कार्यक्रम पार पडले.
धार्मिक विधींनंतर सेवानिवृत्त मुख्याध्यापक विजयकुमार खुळे यांनी भगवान महावीर यांच्या जीवनावर मार्गदर्शन केले. महावीर जयंती हा जैन धर्माचा सर्वात पवित्र आणि महत्त्वाचा सण असून तो २४ वे तीर्थंकर भगवान महावीर यांचा जन्मदिवस म्हणून साजरा केला जातो. भगवान महावीरांनी जगाला सत्य, अहिंसा, अपरिग्रह, अस्तेय व ब्रह्मचर्य यांचा संदेश दिला आहे, असे त्यांनी यावेळेस नमूद केले.या प्रसंगी सरपंच अमोल देशमुख, विजयकुमार खुळे, अशोक खुळे, महावीर घोडके, संतोष गोसावी, जगदीश घोडके, स्वप्नील गोसावी, अजित घोडके, आकाश खुळे, नेमिनाथ खुळे, धनंजय देशमुख, उद्धव ठाकुर, बंडू गाढे यांच्यासह सर्व समाज बांधव मोठ्या संख्येने उपस्थित होते. हा कार्यक्रम यशस्वी करण्यासाठी महिला मंडळातर्फे शकुंतलाबाई खुळे, सुनिता खुळे, नंदा खुळे, सुनिता गोसावी, सुनंदा घोडके, सोनाली घोडके, अंजली गोसावी व पूजा घोडके यांनी विशेष परिश्रम घेतले.
