सकल धनगर समाजाचे सेलूत आंदोलन; घटनादत्त आरक्षणाच्या तत्काळ अंमलबजावणीची मागणी
सेलू : पालकमंत्री मेघना साकोरे-बोर्डीकर यांच्या सेलू शहरातील पाथरी रोडवरील निवासस्थानासमोर सोमवारी (दि.२९) सकाळी ११ ते दुपारी ०३ वाजेपर्यंत सकल धनगर समाजाच्या वतीने ‘ढोल बजाव’ आंदोलन करण्यात आले. या आंदोलनात भागवत दळवे, प्रकाश मुळे, विजय दळवे, आनंद डोईफोडे, दामोधर दळवे, सोपान हारके, विठ्ठल महाराज कारके, रामप्रसाद थटवले, रामेश्वर खेपळ, माणिक हिंगे, विनोद शिंदे, धनंजय थटवले यांच्यासह तालुक्यातील सकल धनगर समाज बांधव मोठ्या संख्येने उपस्थित होते. आंदोलनादरम्यान माजी आमदार बोर्डीकर यांच्या मार्फत पालकमंत्री मेघना साकोरे-बोर्डीकर यांना धनगर समाजाच्या मागण्यांचे निवेदन देण्यात आले. त्याद्वारे, धनगर समाजासाठी घटनादत्त आरक्षणाची तात्काळ अंमलबजावणी करण्यात यावी, तसेच धनगर समाजाचे संविधानिक अनुसूचित जमाती (एसटी) आरक्षण लागू करण्यात यावे, या मुख्य मागण्यांसाठी आंदोलन करण्यात आले. १७ सप्टेंबरपासून जालना येथे दीपक बोर्हाडे हे आमरण उपोषणावर असून, त्यांना १३ दिवस उलटूनही शासनाकडून कोणतीही सकारात्मक दखल घेतली गेली नाही. त्यांची प्रकृती खालावत असल्याची माहिती आंदोलनकर्त्यांनी दिली असून, शासनाने तत्काळ मागण्या मान्य करून त्यांचे उपोषण संपवावे, अशी मागणी करण्यात आली.
