सकाळी ७ ते १२ या वेळेत भरणार शाळा
परभणी : विधानसभा मतदार संघाच्या मतदार याद्या दोष विरहित व अचूक करण्यासाठी विशेष सखोल पुनरीक्षण एसआयआर कार्यक्रम राबविण्यात येत असून सदरील काम निश्चित केलेल्या कालवधीत पूर्ण करणे अत्यंत आवश्यक आहे. त्या कामामध्ये मतदान केंद्रस्तरीय अधिकारी (बीएलओ) यांची महत्वाची भूमिका आहे. या पार्श्वभूमीवर जिल्ह्यातील शाळांची वेळ सकाळी ७ ते १२ करण्यात यावी, असे आदेश जिल्हाधिकारी यांनी शिक्षणाधिकारी प्राथमिक आणि माध्यमिक यांना ८ जुलै रोजी दिले आहेत. या अनुषंगाने प्राथमिक शिक्षणाधिकारी सुनील पोलास यांनी जिल्ह्यातील पंचायत समितीच्या सर्व गटशिक्षणाधिकारी यांना याच दिवशी पत्र काढून आदेशित केले आहे.
शिक्षकांचे नियमित शैक्षणिक जबाबदाऱ्यासह सदर राष्ट्रीय कर्तव्य प्रभावीपणे पार पाडण्यासाठी (बीएलओ) म्हणून नियुक्त शिक्षकांचे शिकविण्याच्या तासिका कमी करून शिक्षकांवर अतिरिक्त ताण येणार नाही असे नियोजन करावे. तसेच परभणी जिल्ह्यातील सर्व माध्यम व सर्व व्यवस्थापनाच्या अभ्यासक्रम चालवणाऱ्या शाळांची वेळ ३० जुलै २०२६ पर्यंत सकाळी ७.०० ते १२.०० वा.पर्यंत करण्यात यावी, असे आदेश देण्यात आले आहेत.
दरम्यान, जिल्हाधिकारी यांच्या २३ जूनच्या आदेशानुसार शैक्षणिक वर्षाच्या प्रारंभी तीव्र उन्हामुळे शाळेच्या वेळेत सकाळी ८ ते १२ असा बदल करण्यात आला होता. पावसाने हजेरी लावल्याने ३० जूनपासून वेळ पूर्ववत करण्यात आली होती. आता ‘एसआयआर’ कार्यक्रमाचे काम प्राधान्याने व्हावे तसेच विद्यार्थ्यांचे शैक्षणिक नुकसान होऊ नये. यासाठी शाळेच्या वेळेत बदल करण्यात आला आहे.
