परभणीच्या आद्या बाहेतीचे टेबल टेनिसमध्ये सुवर्णपदक
परभणी : सांगली येथे नुकत्याच झालेल्या राज्य मानांकन टेबल टेनिस स्पर्धेत परभणीच्या खेळाडूंनी उत्कृष्ट कामगिरी केली. परभणीची खेळाडू आद्या पूजा महेश बाहेती हिने ११ वर्षांखालील मुलींच्या गटात सुवर्णपदक पटकावले. यंदाच्या वर्षातील हे तिचे दुसरे विजेतेपद आहे.
याच स्पर्धेत आद्याने १३ वर्षांखालील गटात कांस्यपदक (तिसरा क्रमांक) जिंकले, तर १५ वर्षांखालील गटात उप-उपांत्यपूर्व फेरीपर्यंत मजल मारली. तिच्यासोबतच शरयू सुरेखा माधव टेकाळे आणि ओवी पूजा महेश बाहेती यांनीही १५ वर्षांखालील गटात उप-उपांत्यपूर्व फेरी गाठून राज्य अव्वल मानांकन यादीत स्थान मिळवले. याशिवाय, अथर्व श्रुती आनंद वैजवाडे याने ११ वर्षांखालील मुलांच्या गटात उप-उपांत्यपूर्व फेरीपर्यंत मजल मारत अव्वल मानांकित खेळाडूंमध्ये आपले नाव कोरले.
हे सर्व खेळाडू स्कॉटिश अकॅडमी स्कूलचे विद्यार्थी असून, त्यांनी परभणी जिल्हा हौशी टेबल टेनिस संघटनेचे प्रतिनिधित्व केले. त्यांना भारतीय खेल प्राधिकरणाच्या (साई) खेलो इंडिया प्रशिक्षण केंद्रातील प्रशिक्षक चेतन मुक्तावार यांचे मार्गदर्शन लाभले. खेळाडूंच्या या यशाबद्दल भारतीय टेबल टेनिस महासंघाचे सरचिटणीस कमलेश मेहता, महाराष्ट्र राज्य टेबल टेनिस संघटनेचे अध्यक्ष प्रवीण लुंकड यांच्यासह अनेक मान्यवरांनी अभिनंदन केले आहे.
