परभणी : धर्मापुरी येथील ज्ञानसाधना प्रतिष्ठानच्या रायरेश्वर माध्यमिक व उच्च माध्यमिक विद्यालयात मराठवाडा मुक्ती संग्राम दिनानिमित्त ध्वजारोहण कार्यक्रम उत्साहात पार पडला. प्रारंभी राष्ट्रपिता महात्मा गांधी आणि हैदराबादच्या स्वातंत्र्य संग्रामातील थोर नेते स्वामी रामानंद तीर्थ यांच्या प्रतिमांचे पूजन करून त्यांना पुष्पहार अर्पण करण्यात आले. मान्यवरांच्या हस्ते ध्वजारोहण झाल्यावर स्काउट गाईड पथकातील विद्यार्थ्यांनी पथसंचलन करत तिरंग्याला मानवंदना दिली.
यावेळी भुसारे आणि खपरले यांनी मराठवाडा मुक्ती संग्रामाचे महत्त्व, उद्दिष्टे, निजामाची राजवट आणि हुकूमशाही विरोधात उभारलेल्या लढ्याबद्दल विद्यार्थ्यांना मार्गदर्शन केले. सौ. भुसारे आणि उर्मिला यांनी आपले मनोगत व्यक्त केले. आरोही अंकुशकर, संस्कृती राऊत, सुप्रिया शेळके, राहुल पावडे आणि वीरूप्रसाद टोम्पे या विद्यार्थ्यांनीही आपली भाषणे सादर केली. कार्यक्रमात आठवीच्या विद्यार्थ्यांनी तयार केलेल्या भित्तीपत्रकाचे मान्यवरांच्या हस्ते विमोचन करण्यात आले. ध्वजगीत, पसायदान आणि महाराष्ट्र गीत सामूहिकरित्या गायले गेले. श्रेया इंटेलिजन्स परीक्षेत उत्तीर्ण झालेल्या स्पर्धकांना बक्षिसेही वितरित करण्यात आली.
कार्यक्रमाचे सूत्रसंचालन सौ. गिरी यांनी केले. महाराष्ट्र गीत सामूहिकरित्या गाऊन कार्यक्रमाची सांगता झाली. या कार्यक्रमात संस्थेचे समन्वयक, विभाग प्रमुख, सर्व शिक्षक आणि शिक्षकेतर कर्मचारी उपस्थित होते. कार्यक्रमाच्या यशस्वीतेसाठी सर्व शिक्षकांनी परिश्रम घेतले.
