उत्कृष्ट निर्यात कामगिरीबद्दल राज्य सरकारच्या उद्योग विभागातर्फे मुंबईत गौरव
सेलू (जि. परभणी) : येथील कोहिनूर रोप्स प्रायव्हेट लिमिटेड या कंपनीसाठी १३ ऑक्टोबर २०२५ हा दिवस अभिमानाचा ठरला आहे. वर्ष २०२२–२३ मधील त्यांच्या उत्कृष्ट निर्यात कामगिरीबद्दल महाराष्ट्र शासनाच्या उद्योग विभागाने आयोजित केलेल्या भव्य सोहळ्यात या कंपनीला सुवर्ण पदक निर्यात उत्कृष्टता पुरस्काराने सन्मानित करण्यात आले. मुंबईतील ताज पॅलेस, बांद्रा येथे हा पुरस्कार प्रदान करण्यात आला.महाराष्ट्र राज्याचे उद्योग मंत्री उदयजी सामंत, मुख्य सचिव राजेश कुमार, उद्योग सचिव डॉ. पी. अंबालगन, तसेच उद्योग विकास आयुक्त दिपेंद्र सिंह कुशवाहा आणि इतर अनेक मान्यवरांच्या शुभहस्ते हा बहुमान देण्यात आला. कंपनीतर्फे संचालक रामवल्लभ बाहेती आणि महेश बाहेती यांनी हा पुरस्कार स्वीकारला.विशेष म्हणजे, कोहिनूर रोप्स प्रा. लि. यांना महाराष्ट्र शासनाकडून निर्यात क्षेत्रातील सातत्यपूर्ण आणि उल्लेखनीय योगदानाबद्दल गौरव मिळण्याची ही सलग चौथी वेळ आहे. या सन्मानामुळे भारताच्या औद्योगिक प्रगतीतील त्यांचे अग्रगण्य स्थान अधिक भक्कम झाले आहे.
कोहिनूर परिवार, हा बहुमान आपल्या निष्ठावंत कामगार बांधवांना, जगभरातील ग्राहकांना आणि महाराष्ट्र शासनाच्या प्रगतिशील औद्योगिक दृष्टीकोनास आदरपूर्वक अर्पण करतो, अशी प्रतिक्रिया उद्योजक नंदकिशोर बाहेती यांनी दिली आहे.
