तहसीलदार डॉ.शिवाजी मगर यांची माहिती, मतदार याद्यांच्या विशेष सखोल पुनरीक्षण कार्यक्रमाबाबत बैठक
सेलू : भारत निवडणूक आयोगाच्या निर्देशानुसार मतदार याद्यांच्या विशेष सखोल पुनरीक्षण (एसआयआर) कार्यक्रमाच्या पार्श्वभूमीवर सेलू येथे सर्व राजकीय पक्षांचे प्रमुख आणि पत्रकारांची विशेष बैठक २८ जुलै २०२६ रोजी पार पडली. तहसीलदार तथा सहाय्यक मतदार नोंदणी अधिकारी डॉ. शिवाजी मगर यांच्या अध्यक्षतेखाली ही बैठक संपन्न झाली.
या बैठकीत मतदार याद्यांचे सुसूत्रीकरण, नवीन मतदान केंद्रांची निर्मिती आणि डिजिटल नोंदणीबाबत सविस्तर माहिती देण्यात आली.डॉ. शिवाजी मगर यांनी दिलेल्या माहितीनुसार, १४ मे २०२६ रोजी घोषित करण्यात आलेल्या या विशेष कार्यक्रमांतर्गत ३० जून २०२६ पासून बीएलओमार्फत घरोघरी जाऊन फॉर्म वाटप करण्यात येत आहे. सेलू तालुक्यात एकूण १,४५,५९२ मतदार असून त्यापैकी १,४४,४७१ मतदारांना फॉर्म वितरित केले आहेत. तसेच १,३३,४४९ (९१.६६ टक्के) मतदारांची माहिती डिजिटाईज्ड करण्यात आली आहे.
पुनरीक्षण कार्यक्रमाचे सुधारित वेळापत्रक : * घरोघरी भेटी: ३० जून २०२६ ते ८ ऑगस्ट २०२६ * प्रारूप मतदार यादी प्रसिद्धी: १७ ऑगस्ट २०२६ * दावे व हरकती नोंदवणे: १७ ऑगस्ट २०२६ ते १६ सप्टेंबर २०२६ * अंतिम मतदार यादी प्रसिद्धी: १९ ऑक्टोबर २०२६प्रारूप मतदार यादीमध्ये नाव नसणे, नाव, वय किंवा जन्मतारखेत त्रुटी असणाऱ्या मतदारांसाठी सुनावणी आयोजित केली जाणार आहे. योग्य कागदपत्रे सादर केल्यानंतर अशा मतदारांची नावे अंतिम मतदार यादीत समाविष्ट केली जातील. तसेच ज्या मतदारांचे फॉर्म डिजिटाईज्ड होण्यास अडचणी येत आहेत, त्यांना बीएलओमार्फत मार्गदर्शन केले जात आहे.
मतदारांच्या सोयीसाठी आणि मतदान केंद्रांवरील गर्दी टाळण्यासाठी १,१५० ते १,२०० पेक्षा जास्त मतदार असलेल्या केंद्रांचे विभाजन करून तालुक्यात ५ नवीन मतदान केंद्र तयार करण्यात येणार आहेत, तर ६ मतदान केंद्रांची दुरुस्ती केली जाणार आहे.या विशेष सखोल पुनरीक्षण कामात सर्व राजकीय पक्ष, बीएलए (बूथ लेव्हल एजंट) यांनी बीएलओ (बूथ लेव्हल ऑफिसर) यांना सहकार्य करावे आणि वृत्तपत्रांनी याबाबत मोठ्या प्रमाणावर जनजागृती करावी, असे आवाहन डॉ. शिवाजी मगर यांनी केले. बैठकीस विविध राजकीय पक्षांचे प्रतिनिधी व पत्रकार उपस्थित होते.
